Kanta ni Sulumun 6 - Hanunuu

Manga Babayi sa Hirusalim

¹ Pinakamarinu pag babayi, naan yi kanmu mahal? Naan tabug siya paglinmakaw hampay maawatan nimi kawu hanapun siya?

Babayi

² Kang mahal nag-atag sa kay gardin punu halaman pagbuwatun pamanglu. Magpaharab siya ati kay hayup, ag magbuul manga liryu.

³ Kang mahal kangku lang, ag aku kanya lang. Pag-ipaharab niya kay hayup sa may manga liryu.

Ikalima pag Kanta Lalaki

⁴ Marinu kawu, mahal niku. Parihu karinu sa banwa Tirsa ag Hirusalim. Makadululaw gid kawu parihu sa manga sundalu may manga bandira.

⁵ Danga aku pagturuna dahil unman aku pumadugay bumantay sa kanmu. Kanmu buhuk parihu sa kadamlan manga kambing maglus-ug ginan sa Bantud Gilyad.

⁶ Kanmu manga ngipun parihu kalagti sa karanidu bag-u lang parigus. Kumpilitu inda ag mayad kay mapaulian.

⁷ Maragang-ragang kanmu pingi magkatakbunan taung parihu sa burak pumigranata.

⁸ Una waya may imaw aku 60 ka asawa rayna, ag may 80 ka asawa suruguun, bag-u mayamu pag manga daraga ti ipakasal sa kangku,

⁹ usa lang gid kang mahal. Marinu gid siya ag unman gid may alangan. Usa lang siya pag anak babayi niya ina ag palangga siya niya ina. Nu makitan siya manga babayi, pagdayawun nida siya, ag una manga rayna hanggan manga asawa suruguun magdayaw sa kanya.

¹⁰ Magkun sida, “Si unu lugud inda nu bantayun parihu sa magkasurip kay rinu? Kay rinu parihu sa bulan, ag kay kasilaw parihu sa init. Makadululaw gid siya parihu sa manga pamgasan.”

¹¹ Nag-ati aku sa taranuman kayu almindru hampay bantayan ti manga bag-u tanum magtubu sa may bululusan danum, ag hampay bantayan nu magsalingsing yi ti manga ubas ag nu magbusang yi ti manga pumigranata.

¹² Unman niku namalayan atay yi maaw aku sa kagalang-galang pag irigyaan kaibahan kang mahal.

Manga Babayi sa Hirusalim

¹³ Pagbalik kawu, daraga taga Sulam, pagbalik kawu hampay makitan nimi kawu. Hayga gustu gid niyu makitan ti daraga taga Sulam magsayaw sa karaw-an manga magbantay?