Kanta ni Sulumun 5 - Hanunuu

Lalaki

¹ Sinmulud aku sa kang gardin, sa mahal niku pag babayi. Tinipun niku kang mira hanggan manga pamanglu. Kinaun niku kang daykut ag nanginum kang intus hanggan gatas. Kamu pag manga magmalahalan, pagkaun kamu ag pag-inum.

Ikap-at pag Kanta Manga Babayi sa Hirusalim Babayi

² Habang magkaturug aku nanagin-up aku. Nadnugan niku magtaruktuk kang mahal. Magkun siya, “Bukasi aku, marinu gid pag mahal niku. Dahil basa yi tun-ug kang ulu.”

³ Dapat magkun aku, “Nauba yi niku kang rutay, isulung yi aw maan lugud niku inda? Nakaugas yi aku kang lulud, uringan yi aw maan lugud niku inda?”

⁴ Hiniyaptan niku mahal ti kandadu niku sabian, ag nakabaya gid kang tagipusuun.

⁵ Binmangun aku hampay ipaslud siya. Ag pagka hiniyaptan niku ti kandadu niku sabian, tinmiktik ti mira sa kang kamang.

⁶ Binukasan niku kang mahal, dapat unman yi lagan siya. Gustu gid niku masaydan kay busis. Nakan tinawagan niku siya, dapat unman siya sinmagut. Hinanap niku siya, dapat unman niku siya nakitan.

⁷ Nakitan aku manga guwardiya habang magpalibut-libut sida sa banwa. Binakul nida aku, ag nabiyagan aku. Bin-ul waya nida kang kulimpay.

⁸ Kamu pag manga babayi Hirusalim, pagtaratu kamu nu makitan niyu kang mahal sabihi niyu siya magpanlumuy aku dahil sa pagmahal.

Manga Babayi sa Hirusalim

⁹ Marinu pag babayi, unu gid lugud may imaw kanmu mahal unman may imaw sa iba, ag pag-ipataratu waya nimu kami? Mas mayad gid aw lugud siya sa iba?

Babayi

¹⁰ Kang mahal makurasug ag magkaragang-ragang kay lukub. Sa sampulu ka libu lalaki usa-usa lang siya.

¹¹ Mas mahalaga waya sa gintu kay ulu. Kay buhuk ga kulut ag parihu sa uwak kay kabiru.

¹² Kay mata parihu ka rinu sa manga mata kalampati ga gatas kay ka lagti, mahanayan sa saruy sapa. Parihu inda karinu sa mahalaga pag manga batu.

¹³ Kay pingi mabanglu parihu sa gardin punu halaman pagbuwatun pamanglu. Kay bibig parihu sa manga liryu pagbulusan mira.

¹⁴ Kay manga takyay parihu sa lunsay gintu pinarinuan mahalaga pag manga batu. Kay bilug parihu sa pinakinis bangkil ilipanti may pamarinu mahalaga batu sapiru.

¹⁵ Kay manga balangbang parihu sa manga tulduk marmul matindugan sa patakinan balay lunsay gintu. Marinu gid siya bantayun, parihu sa manga kayu sidru sa Libanun.

¹⁶ Mayad arukan kay bibig, marinu gid siya. Manga babayi sa Hirusalim, siya kang mahal, kang kakilala.