Kanta ni Sulumun 4 - Hanunuu

Lalaki

¹ Pagkarinu duy kawu, mahal niku. Kanmu manga mata magkatakluban nimu taung parihu sa mata kalampati. Kanmu buhuk parihu sa kadamlan manga kambing maglus-ug ginan sa Bantud Gilyad.

² Kanmu manga ngipun malagti parihu sa karanidu bag-u lang nauguyan ag naparigusan. Kumpilitu inda ag mayad kay mapaulian.

³ Kanmu bibig parihu sa maragang puyud. Udyi may pumarihu kay rinu. Kanmu pingi magkatakluban taung parihu sa burak kayu pumigranata maragang-ragang.

⁴ Kanmu liug parihu sa bantayaw ni Dabid marinu kay nagpatindug. May unu inda ga linibu panangga manga sundalu.

⁵ Kanmu dubdub parihu sa kapid karasyaw, magharab sa may manga liryu.

⁶ Bag-u rumayaw ti surip ag bag-u dumulum, unman aku mighit sa kanmu dubdub ga manga bantud mabanglu mira ag kamangyan.

⁷ Mahal niku, marinu kawu. Unman gid kawu may alangan.

⁸ Pagkuyug kawu sa kangku ginan sa Libanun, mahal niku. Lumus-ug kita ginan sa tagudtud manga bantud Amana, Sinir ag Hirmun, pag-ulian manga liyun ag manga liyupardu.

⁹ Mahal niku pag babayi, binihag nimu kang tagipusuun sa usa lang nimu ka pagbantay ag sa usa lang ka batu nimu unu sa liug.

¹⁰ Ga kabitay yi kay katagsing kanmu pagmahal, mahal niku pag babayi. Mas matagsing waya inda kaysa intus. Kanmu pamanglu mas mabanglu waya kaysa una hintay pag kalasi pamanglu.

¹¹ Kanmu manga aruk ga daykut kay katagsing, mahal niku. Hu, kanmu dila ga may daykut ag gatas. Kay hungaw nimu rutay parihu kabanglu sa kayu sidru sa Libanun.

¹² Mahal niku pag babayi, parihu kawu sa sinaraduhan pag gardin may bulbugan.

¹³ Kay manga kayu magburak pumigranata ag iba waya manga mayad burak. Abunda inda sa manga pamanglu hinna, nardu,

¹⁴ saprun, kalamus, sinamun, tuhay-tuhay pag kalasi kamangyan, mira, alui, ag iba waya pinakamabanglu pag manga pamanglu.

¹⁵ Hu, parihu kawu sa gardin may bulbugan magbulus ginan sa manga kabantudan Libanun.

Babayi

¹⁶ Kamu pag durus amihan ag abagat, paghuyup kamu sa kang gardin hampay mawayak kay hungaw. Paatiha kang mahal sa kay gardin agud mangaun pinakamarinu pag manga burak.