Kanta ni Sulumun 3 - Hanunuu

¹ Sa yabi, habang mahuwayan aku, mag-ayup aku sa kang mahal. Pag-ayup-ayupun niku siya dapat unman lagan.

² Nakan binmangun aku ag pinalibut niku ti banwa, ti manga dalan hanggan ti manga buruybuyahan. Linigaw niku kang mahal dapat unman niku siya nakitan.

³ Nakitan aku manga guwardiya magpalibut-libut sa banwa. Pinaingana niku sida, “Nakitan aw niyu kang mahal?”

⁴ Udwaya aku nikarayu ginan sa manga guwardiya, nakitan niku kang mahal. Hinagkung niku siya mahigpit, unman yi niku siya binul-iwan tugka sa nadara niku siya sa balay niku ina, ati sa sulud-sulud nu naan aku nabuu.

⁵ Kamu pag manga babayi sa Hirusalim, pagtaratu kamu sa panab-anan manga karasyaw ag manga gasila kuntay balaw niyu pilitun ti pagmahal habang udwaya kay kang-ud pag kaudasan.

Ikatlu pag Kanta Manga Babayi sa Hirusalim

⁶ Si unu nguna inda ti pararas-ugun ginan sa pangawakawaan ga sa madamul pag anus may hungaw mira ag kamangyan — manga pamanglu pag-ipabili manugnigusyu?

⁷ Tunda ti kalisa ni Sulumun pagpalibutan 60 ka pinakamabisug pag manga sundalu Israil.

⁸ May sabak baladaw sida tanan, ag anad sida sa labanan. Alistu sida nu may man-gira, una sa yabi.

⁹ Tunda pag kalisa ipinabwat ni Hari Sulumun buwat ginan sa manga kayu sa Libanun.

¹⁰ Kay manga tulduk inda sinaput pilak ag kay tabun binurdahan gintu. Kay kutsun turukawan masaputan sa rutay kulay dungun. Kay sulud kalisa pinarinu manga babayi Hirusalim.

Babayi

¹¹ Pagluwas kamu manga babayi Hirusalim, bantayi niyu si Hari Sulumun may sangbaw kuruna. Ipinasangbaw inda niya ina katpung sirang lubus siya masulung — ti sirang niya kasal.