Kanta ni Sulumun 2 - Hanunuu

Babayi

¹ Aku parihu sa busang Sarun ag parihu sa liryu sa may karatagan.

Lalaki

² Nu ipaparihu sa iba pag manga babayi, kang mahal parihu sa liryu sa karaw-an dugihan ilamnun.

Babayi

³ Nu ipaparihu sa iba pag manga kalay-awan lalaki, kang mahal parihu sa kayu mansanas sa karaw-an makayu sa kapuruan. Magkaibug gid aku pumahamuy sa kay sirung, bag-u samitan ti matagsing niya pag burak.

⁴ Dinara niya aku sa handaan hampay makitan tanan nu kabitay kay pagmahal sa kangku.

⁵ Pakauna niyu aku pinauga ubas hanggan mansanas hampay bumisug maan, dahil nanlumuy aku sa pagmahal.

⁶ Kay wala pag kamang kang pagsangdayanan, ag kay sikun mahagkungan sa kangku.

⁷ Kamu pag manga babayi sa Hirusalim, pagtaratu kamu sa panab-anan manga karasyaw ag manga gasila kuntay balaw niyu pilitun ti pagmahal habang udwaya kay kang-ud pag kaudasan.

Ikadwa pag Kanta Babayi

⁸ Nadnugan niku ti busis niku mahal. Magras-ug siya paluksu-luksu sa kabantudan

⁹ parihu sa karasyaw. Bantayi, matindugan siya sa dayu nimi balay, magpasirang sa kangku sa gaha.

¹⁰ Magkun siya sa kangku, “Abala, mahal niku. Pagkuyug kawu sa kangku, marinu pag babayi niku.

¹¹ Tapus yi ti tigraramig hanggan ti tig-ururan.

¹² Magburusangan yi ti manga ilamnun sa padang, ag udas yi pagkarantahan. Madnugan yi ti uni manga kalampati sa katanmanan.

¹³ Lutu yi ti manga igus ag mag-alamyu yi ti busang manga ubas. Abala yi, mahal niku. Pagkuyug kawu sa kangku, kang marinu pag babayi.”

Lalaki

¹⁴ Parihu kawu sa kalampati magpatagu sa ukang batu. Pakakitan sa kangku kanmu marinu uyahun ag padnugan kanmu marinu busis.

Manga Babayi sa Hirusalim

¹⁵ Kabisug! Dakpa ti dariit pag manga talun idu magpandaut sa kanmi manga ubasan magburusang.

Babayi

¹⁶ Kang mahal kangku lang, ag aku kanya lang. Pag-ipaharab niya kay hayup sa may manga liryu.

¹⁷ Bag-u rumayaw ti magkasurip hanggan bag-u dumulum, pagbalik kawu, mahal niku. Palagiw kawu parihu kay kaliksi sa karasyaw magpalagiw sa karaw-an duwa ka bantud.