Kanta 99 - Hanunuu

Kanta 99 Ti Panginuun Banal pag Hari

¹ Maghari ti Panginuun, matukawan sa tukawan hari sa karaw-an manga kirubin. Nakan takigan sa kadalaan ti manga tawu ag matandug ti kalibutan.

² Makamaskihan ti Panginuun sa Siun; maghari siya sa tanan nasyun.

³ Dumayaw ti manga tawu sa kanya dahil makamaskihan ag garalangun siya. Banal siya!

⁴ Makamaskihan siya pag Hari ag magkaibug sa katadlungan. Matadlung kay maghari; kang-ud kay pagbuwatun sa Israil.

⁵ Dayawa ti Panginuun kanta Diyus. Sambaha siya sa kay Balay. Banal siya!

⁶ Si Muysis ag si Aarun kabilang sa kay manga manughandug, ag si Samwil ti usa sa manga magdarangin sa kanya. Magtawag sida sa kanya ag sinagut niya sida.

⁷ Maghampang siya sa kanda ginan sa rurum ga tulduk; tinupad nida ti ipinakaun niya sa kanda pag manga patigayun hanggan surundanun.

⁸ Panginuun nimi Diyus, sinagut nimu ti darangin nimu manga nasakupan. Ipinakakit nimu sa kanda kawu mapinatawadun pag Diyus una pinarusahan nimu sida sa kanda manga kasalanan.

⁹ Dayawa ti Panginuun kanta Diyus. Sambaha siya sa kay banal pag Bantud, dahil banal ti Panginuun kanta Diyus.