Kanta 98 - Hanunuu

Kanta 98 Dayawa ti Diyus Manugsintinsiya

Usa ka Kanta.

¹ Manganta kita bag-u pag kanta sa Panginuun, dahil nagbuwat siya makadululaw pag manga bagay! Sa panab-anan niya sadili kamaskihan ag kabisugan tinalu niya kanta manga kalaban.

² Ipinakakit Panginuun sa manga nasyun kay inawatan kita ag ipinanalu.

³ Balaw niya kinalimtan kay pagmahal ag pagkamatinupadun sa kanta, sa nasakupan Israil. Nakitan tanan tawu sa buu kalibutan nu kabitay kita ipinanalu nita Diyus.

⁴ Kamu pag manga nasakupan sa buu kalibutan, paghuyaw kamu sa Panginuun dahil sa kabayaan. Pagkanta kamu may kabayaan sa pagdayaw sa kanya.

^5-6 Pagkanta kamu manga pagdayaw sa Panginuun habang pagpatunugan manga pamatunug, ag paghuyaw kamu sa kabayaan sa atubangan Panginuun kanta Hari.

⁷ Pagbaya ti kalibutan hanggan ti tanan mag-uli asan, hanggan yi ti dagat ag ti tanan asan.

⁸ Pagpalakpak ti manga sapa ag pagdurungan pagkanta sa kabayaan ti manga bantud.

⁹ Pagmasulung sida sa atubangan Panginuun dahil rumas-ug siya agud sintinsiyahan ti manga tawu sa kalibutan. Sintinsiyahan niya sida may katadlungan, balaw siya may pagkampihan.