Kanta 97 - Hanunuu

Kanta 97 Ti Diyus Abwat sa Tanan pag Takinan

¹ Maghari ti Panginuun! Nakan pagbaya ti kalibutan, hanggan yi ti manga puru.

² Pagsangputun siya madamul pag rurum, ag maghari siya may katuwiran ag katadlungan.

³ Mag-una sa kanya ti apuy magsunug sa kay manga kalaban sa sangput.

⁴ Kay kilat magrayaw sa kalibutan. Pagka nakitan inda manga tawu pagtakigan sida sa dala.

⁵ Magkatunaw ti manga bantud parihu sa kandila sa atubangan Panginuun, ti Panginuun mamaski sa buu kalibutan.

⁶ Pag-ipaburayhaw langit kuntay matadlung siya, ag ti tanan tawu nakakit sa kay kamaskihan.

⁷ Nangay-a ti tanan magsamba sa manga diyus-diyusan hanggan ti magpalabi-labi kanda manga diyus-diyusan. Ti tanan diyus magluhud magsamba sa Diyus.

⁸ Panginuun, nasaydan manga taga Siun hanggan iba waya pag manga banwa Huda kuntay parusahan nimu kanda manga kalaban, nakan magbaya sida.

⁹ Dahil kawu, Panginuun, ti Kaabwat-abwatan pag Diyus, maghari sa buu kalibutan. Langbaw kawu sa tanan pag diyus.

¹⁰ Ti manga magmahal sa Panginuun kailangan magbugya sa kadautan. Dahil pag-alagaan Panginuun ti buhi niya matinupadun pag nasakupan, ag pag-iribri niya sida sa kamang manga daut.

¹¹ Ti kaayadan Diyus ga sirang magsinggit sa manga matadlung ag magpakaun inda kabayaan sa kanda.

¹² Kamu pag manga matadlung, pagbaya kamu dahil sa binwat Panginuun sa kanyu. Dayawa niyu siya bilang pag alaala nu kabitay siya ka banal.