Kanta 96 - Hanunuu

Kanta 96 Ti Diyus ti Pinakamakamaskihan pag Hari

¹ Kamu pag manga tawu sa buu kalibutan, pagkanta kamu bag-u pag kanta sa Panginuun!

² Pagkanta kamu sa Panginuun, dayawa niyu siya. Itultul niyu kada sirang ti tungkul sa pagribri niya sa kanta.

³ Itultul niyu sa tanan nasakupan manga nasyun kay kamaskihan hanggan kay makadululaw pag manga buwat.

⁴ Dahil makamaskihan ti Panginuun, dapat gid dayawun. Kailangan siya galangun labaw sa tanan pag diyus,

⁵ dahil ti tanan diyus iba manga nasyun unman may pulus, ti Panginuun imaw ti naglalang kalangitan.

⁶ Sa kanya ti kamaskihan ag kadayawan; ti kabisugan hanggan karinuan asan sa kay Balay.

⁷ Dayawa niyu ti Panginuun, kamu pag manga nasakupan manga nasyun. Dayawa niyu kay kamaskihan hanggan kay kabisugan.

⁸ Ipakaun sa Panginuun ti angay sa kanya pag manga pagdayaw, pagdara kamu handug sa kanyu pagsaka sa kay Balay.

⁹ Sambaha niyu siya sa kay kabanalan. Paggalang kamu sa kanya, kamu pag manga nasakupan sa buu kalibutan.

¹⁰ Tultulan niyu sa tanan nasakupan manga nasyun kuntay, “Maghari ti Panginuun.” Ibinugtang niya marig-un ti kalibutan, balaw inda magkatandug. Intindihun niya ti manga tawu balaw may pagkampihan.

^11-12 Pagmasulung ti kalangitan hanggan ti kalibutan, hanggan yi ti kalalawdan, ti karatagan, ag ti tanan asan sa kanda. Ti tanan kayu sa katalunan manganta sa kabayaan

¹³ sa atubangan Panginuun. Dahil pihu yi rumas-ug siya agud intindihun ti manga tawu sa kalibutan. Intindihun niya sida may katadlungan ag angay sa kay katutuuhanan.