Kanta 95 - Hanunuu

Kanta 95 Manga Kanta sa Pagdayaw

¹ Abala kamu, manganta kita sa kabayaan. Paghuyaw kita sa Panginuun, ti palalan-iban pag batu magribri sa kanta.

² Pagpakarani kita sa kanya may pasalamat, ag paghuyaw kita magkanta sa pagdayaw sa kanya.

³ Dahil ti Panginuun makamaskihan pag Diyus. Makamaskihan siya pag hari ag abwat sa tanan pag diyus.

⁴ Siya ti may apu sa manga kaabasad-basadan daga hanggan sa manga katayungtungan manga bantud.

⁵ Siya diman ti may apu sa dagat hanggan sa daga kay linalang.

⁶ Abala kamu, manluhud kita mansamba sa Panginuun ti naglalang sa kanta.

⁷ Dahil siya kanta Diyus, ag kita kay nasakupan kay pagbantayan ag pag-alagaan parihu sa manga karanidu. Nu masaydan niyu kainda ti busis Diyus,

⁸ danga pagpaganita kanyu manga tagipusuun parihu sa binwat niyu manga ginurang kaybi ati sa Miriba, kumun diman katpung ati sida sa may pangawakawaan Masa.

⁹ Magkun ti Diyus, “Ati sinubukan nida aku una nakitan yi nida kang binwat sa kanda.

¹⁰ Sa sulud 40 ka timpu nagalit gid aku sa tunda pag sinulput. Bag-u magkun aku manga tawu sida nagtalang ag balaw magsunud sa kang manga pag-itudlu sa kanda.

¹¹ Nakan sa kang pangagalit nagsumpa aku kuntay balaw gid nida matanggap ti kaariwayahan ginan sa kangku.”