Kanta 94 - Hanunuu

Kanta 94 Ti Diyus ti Manugsintinsiya sa Tanan

¹ Panginuun, kawu ti Diyus magbalus; pakakitan kanmu pangagalit.

² Kawu ti magsintinsiya sa tanan tawu; nakan, malu, balusi ti manga pudilun angay lang sa kanda.

³ Panginuun, kapira tugka waya lugud ti magbaya manga daut?

⁴ Sida tanan magbuwat daut masyadu magpadayaw.

⁵ Pag-unuunuhun nida kanmu magkaapu pag nasakupan.

⁶ Ipinamatay nida ti manga buranday pag babayi, hanggan ti manga ulila, ag ti manga day-uhan.

⁷ Magkumun sida, “Balaw maghiling ti Panginuun sa kanta manga pagbuwatun; ti Diyus ni Hakub unman magsagut.”

⁸ Kamu pag manga kurang sa intindi ag maganit ulu pag manga tawu, kapira waya lugud kamu pag makaintindi? Malu intindiha niyu inda:

⁹ Ti Diyus ti naglalang kanta manga tuli hanggan manga mata, unman aw lugud siya makadnug ag makakit sa kanta?

¹⁰ Siya ti magtamyaw sa manga nasyun, unman aw siya pumarusa sa kanyu? Siya ti magtudlu sa manga tawu, unman aw siya may alam?

¹¹ Alam Panginuun ti manga pag-isip-isipun manga tawu unman may pulus.

¹² Panginuun, mapalad ti tawu kanmu pagtamyawun sa panab-anan pagtudlu sa kanya kanmu manga kasuguan.

¹³ Pagtudluan nimu siya hampay may kahusayan siya sa udas kakurian tugka sa udas parusahan nimu ti manga daut.

¹⁴ Dahil balaw gid nimu pagbugyahan, Panginuun, ti pag-apuun nimu pag nasakupan.

¹⁵ Pihu mangyari maan ti matadlung pag pagsintinsiya, ag sundun inda tanan tawu magpangabuhi matadlung.

¹⁶ Unman may tuhay mag-awat sa kangku laban sa daut pag manga tawu, nu unman kawu lang gid, Panginuun.

¹⁷ Nu unman nimu aku pag-awatan mahimu tigbak yi aku kainda.

¹⁸ Pagka magkun aku sa kanmu, Panginuun, “Ga mamatay yi aku,” inawatan aku nimu pagmahal.

¹⁹ Pagka nataranta aku, pinabisug ag pinasulung nimu aku.

²⁰ Balaw mahimu pumakampi sa kanmu ti daut pag manga manughusay, ti manugbuwat daut sa panab-anan kasuguan.

²¹ Nagkausa sida sa paglaban sa manga matadlung ag pagsintinsiyahan nida kamatayan ti manga balaw may kasalanan.

²² Dapat kawu, Panginuun kang Diyus, imaw kang darangpan ag palalan-iban pag batu.

²³ Parusahan nimu sida ag rurisun dahil sa kanda manga kasalanan. Rurisun gid nimu sida, Panginuun nimi Diyus.