Kanta 92 - Hanunuu

Kanta 92 Manga Kanta sa Pagdayaw sa Diyus

Ti kanta para sa Sirang Pamahari.

¹ Panginuun Kaabwat-abwatan pag Diyus, mayad gid ti magpasalamat ag magkanta manga pagdayaw sa kanmu.

² Mayad gid ti magtultul sirang yabi tungkul sa kanmu pagmahal ag katapatan,

³ pagkaskasan manga pamatunug may manga bakyang.

⁴ Dahil pinasulung nimu aku, Panginuun, sa panab-anan nimu makadululaw pag manga buwat. Dahil sa kanmu manga binwat magkanta aku sa kabayaan.

⁵ Panginuun, makamaskihan kanmu manga binwat! Balaw nimi masalman kanmu naisipan.

⁶ Balaw masalman manga kurang kay intindi ngatay manga maganit kay ulu,

⁷ una mag-alwan ti manga daut parihu sa ilamnun magtubu, rurisun sida sa unman may katapusan.

⁸ Dapat kawu, Panginuun, abwat sa tanan sa unman may katapusan.

⁹ Pihu gid ti tanan nimu daut pag manga kalaban magkarawayak ag magkaramatay.

¹⁰ Pinakan-an nimu aku kabisugan parihu sa kabisugan simarun pag baka, ag pinakan-an nimu aku kabayaan.

¹¹ Nasaydan niku ag nakitan ngapu ti pagkatalu niku daut pag manga kalaban.

¹² Ti manga matadlung mag-alwan ga manga palma maglangba, ag rumig-un sida parihu sa manga kayu sidru sa Libanun.

¹³ Parihu sida sa manga kayu itinanum sa Balay Panginuun nita Diyus,

¹⁴ maglangba ag magburak di una gurangun yi, ag parargu maglangba ag magrig-un.

¹⁵ Pag-ipakakit lang inda matadlung ti Panginuun kang palalan-iban pag batu; unman gid may kadautan sa kanya.