Kanta 91 - Hanunuu

Kanta 91 Ti Diyus Kanta Manug-alaga

¹ Una si unu ti magpangulian sa arani Kaabwat-abwatan pag Diyus Makapangyarihan alagaan siya.

² Sumabi siya sa Panginuun, “Kawu kang darangpan ag matibay pag paratag-an. Kawu kang Diyus kang pagsarigan.”

³ Pihu gid iribri niya kawu sa manga suduk hanggan sa ikamatay pag manga durungugun.

⁴ Dahanan niya kawu parihu sa pag-alaga manuk sa kay manga butu sa sirung niya manga pakpak. Sa kay katapatan, ingatan niya kawu ag apinan.

^5-6 Balaw kawu madala sa manga kaladalaan, sa ugyung manga kalaban, sa manga durungugun, ag manga sarut magras-ug sa yabi ngatay sirang.

⁷ Una linibu ka manga tawu ti magkaramatay sa kanmu sangput, balaw kawu maunu.

⁸ Makitan nimu nu kabitay pagparusahan ti daut pag manga tawu.

⁹ Dahil binwat nimu darangpan ti Panginuun, ti Kaabwat-abwatan pag Diyus, imaw ti manug-alaga,

¹⁰ unman may kadautan ngatay sarut rumas-ug sa kanmu ngatay sa kanmu magtal-anakan.

¹¹ Dahil suguun Diyus kay manga anghil hampay alagaan kawu una naan kawu tabug.

¹² Bahitun kawu nida hampay balaw mabiyagan kanmu lulud sa batu.

¹³ Tat-an nimu ti manga liyun hanggan ti madalit pag manga ulay.

¹⁴ Magkun ti Diyus, “Iribri niku ag alagaan ti magmahal ag magkilala gid sa kangku.

¹⁵ Nu mandangup siya sa kangku, sagtun niku siya; nu udas may kakurian, ibahan niku siya; iribri niku siya ag pakan-an kadayawan.

¹⁶ Pakan-an niku siya aba pag buhi, ag ipakakit niku sa kanya kang pagribri sa kanya.”