Kanta 90 - Hanunuu

Kanta 90 Ti Diyus ag ti Tawu

Kay darangin ni Muysis, ti manugsirbi Diyus.

¹ Panginuun, kawu kanmi ulian ginan waya sa kabag-u.

² Sa udwaya nimu linalang ti manga bantud hanggan ti kalibutan, kawu yi ti Diyus, ag kawu diman ti Diyus sa unman may katapusan.

³ Kawu ti magpasya sa kamatayan tawu; pag-ibalik nimu siya sa daga sa kay gininanan.

⁴ Ti usa ka libu timpu sa kanmi ga usa lang ka sirang ti linmawuy sa kanmu, ngatay ga dag-ud lang pag udas sa yabi.

⁵ Pagpaulian nimu katapusan kanmi buhi parihu sa tagin-up

⁶ ngatay parihu sa ilamnun magluwang ag magtubu nu surip, dapat igu malambung magkalayung ag magkamatay.

⁷ Kanmu pangagalit magpadala ag magruris sa kanmi.

⁸ Mag-akitan nimu kanmi manga kasalanan. Una ti manga kasalanan nabwat nimi sa lihim, alam di nimu.

⁹ Ungud mamatay kami dahil sa kanmu pangagalit; umapas kanmi buhi ga usa lang ka arup.

¹⁰ Ti pinakadugay nimi buhi 70 ka timpu, ngatay 80 ka timpu nu mabisug kami. Dapat una kanmi pinakamarinu pag manga timpu mayamu kaarimputuhan ag kakurian. Ungud gid balaw magdugay kanmi buhi ag madura kami.

¹¹ Balaw may nakalakaw kanmu lubus pangagalit. Ag habang magdugang kanmi naalaman sa kanmu pangagalit magdugang diman kanmi paggalang sa kanmu.

¹² Paintindihan sa kanmi dag-ud lang kanmi buhi, hampay dumunung kami sa kanmi magkabuhi.

¹³ Panginuun, tugka kapira waya lugud kanmu pangagalit sa kanmi? Patingihi ag kaawai kami kanmu manga manugsirbi.

¹⁴ Kada surip ipakakit kanmu pagmahal sa kanmi hampay manganta kami sa kabayaan ag masulung kami sa buu nimi pagbuhi.

¹⁵ Pakan-i kami kabayaan parihu kay kadugay sa manga timpu pinarusahan nimu kami ag pinakurian kami.

¹⁶ Pakakitan nimu sa kanmi sa kanmu manga manugsirbi, hanggan sa kanmi manga linahi, kanmu makadululaw pag buwat ag kanmu pagkamakapangyarihan.

¹⁷ Panginuun nimi Diyus, mana papaladan nimu kami ag pakan-an kapanaluhan sa tanan nimi manga pagbuwatun.