Kanta 9 - Hanunuu

Kanta 9 Ti Matadlung pag Pagsintinsiya Diyus

Kanta ni Dabid para sa manugpanguna sa magkanta. Kantaha inda sa tunu kanta “Ti Pagkamatay Anak”.

¹ Panginuun, pasalamatan niku kawu sa buu niku tagipusuun. Itultul niku ti tanan nimu makadululaw pag manga binwat.

² Kaabwat-abwatan pag Diyus, makabaya gid aku ag manganta manga pagdayaw dahil sa kanmu.

³ Nu atubangun yi nimu kang manga kalaban, mag-iridaphag sida sa palagiw, ag magkaramatay sida.

⁴ Dahil matadlung kawu pag manugsintinsiya matukawan sa kanmu tukawan; sinintinsiyahan nimu aku ag napatutuuhanan nimu unman aku may kasalanan.

⁵ Sinintinsiyahan nimu ag pinarusahan ti daut pag manga nasyun nakan balaw yi gid sida maimatun-an hanggan aban.

⁶ Rinuris nimu lubus kang manga kalaban, ag balaw yi gid sida makitan hanggan aban. Pinandaut nimu kanda manga banwa, ag udyi gid sida maimatun-an waya.

⁷ Dapat kawu, Panginuun, maghari unman may katapusan; alistu yi kanmu tukawan para sa pagsintinsiya.

⁸ Panguluhan nimu may katadlungan ti manga tawu sa kalibutan, sa unman may pagkampihan.

⁹ Panginuun, kawu ti darangpan manga pag-apihun sa udas kakurian.

¹⁰ Magsarig sa kanmu ti magkilala sa kanmu pag manga tawu. Dahil balaw nimu pagbugyahan ti manga magdangup sa kanmu.

¹¹ Kantahi niyu manga pagdayaw ti Panginuun, ti maghari sa Siun! Tultulan niyu sa manga nasyun kay manga binwat!

¹² Unman niya pagkalimtan ti magpaawat manga pag-unuunuhun; pagbalusan niya ti manga magpakuri sa kanda.

¹³ Panginuun, bantayi nimu nu kabitay kay magpakuri sa kangku niku manga kalaban. Kaawai duy aku ag ribrihan sa kamatayan,

¹⁴ hampay mitultul niku sa manga tawu ati sa manga sabian Siun kanmu manga binwat, imaw kay dahilan nakan magdayaw aku sa kanmu. Makabaya aku ati dahil irinibri nimu aku.

¹⁵ Nangyari ngap sa manga nasyun kanda ginayak daut. Ga nalagpak sida sa kanda kinali pag ukang ngatay nasduk sida sa kanda ipinauli pag suduk.

¹⁶ Napaburayhaw ti Panginuun nu si unu gid siya sa panab-anan pagsintinsiya niya matadlung, ag ti daut ngap pag manga tawu ti nidamhak sa kanda daut pag manga pagbuwatun.

¹⁷ Mamatay ti daut pag manga tawu sa tanan nasyun, dahil pagdayuun nida ti Diyus.

¹⁸ Balaw pabay-anan Diyus ti manga pugri hanggan aban. May pag-asa di ti manga pugri iribri sida Diyus.

¹⁹ Malu duy, Panginuun, danga pagpahintuluti manalu ti kabisugan manga tawu. Sintinsiyahi ti manga nasyun sa kanmu atubangan.

²⁰ Panginuun, padalaa sida, ag paintindihan sa kanda kuntay sida manga tawu lang.