Kanta 88 - Hanunuu

Kanta 88 Ti Darangin Tawu Mag-agwanta

Kanta ni Himan, anak ni Sira kay linahi ni Kura, para sa manugpanguna sa magkanta. Ti “maskil” ngatay tula. Gamita ti pamatunug “Mahalat Lianut”.

¹ Panginuun, kawu ti Diyus kang manugribri. Sirang yabi magtawag aku sa kanmu.

² Patingihi kang darangin; saguta kang magtawag sa kanmu.

³ Dahil mayamu pag manga kakurian magras-ug sa kangku ag ga sa mamatay yi gid aku.

⁴ Usa yi aku sa manga hirimugtasun. Parihu aku sa tawu balaw yi maawatan.

⁵ Pinabay-anan yi lang aku kaibahan manga namatay. Parihu aku sa manga minatay mabuyangyangan sa lulubngan, kinalimtan yi nimu ag balaw yi maawatan.

⁶ Ga ipinauli yi nimu aku sa masyadu abasad ag madlum pag kali.

⁷ Masyadu gid kanmu pangagalit sa kangku; ga sa manga humbak inda maghampak sa kangku.

⁸ Ipinakarayu nimu sa kangku kang manga kakilala. Binwat nimu aku mayagting para sa kanda. Linibutan aku ag unman yi makapalagiw.

⁹ Dahil sa kang manga pag-agwanta, magpandulum kang pamantay. Panginuun, kada sirang magtawag aku sa kanmu pag ipaabwat kang manga kamang.

¹⁰ Unman kawu magbuwat manga makadululaw para sa manga namatay, ag unman sida magbangun sa pagdayaw sa kanmu.

¹¹ Kanmu pagmahal ag katapatan unman paghampangan sa rugar manga namatay.

¹² Unman mag-akitan kanmu manga makadululaw hanggan pagkamatadlung sa madlum pag rugar manga namatay, nu naan ti tanan balaw yi magkaimatun-an.

¹³ Nakan ngani, Panginuun, maghagad aku awat sa kanmu. Kada surip magdarangin aku sa kanmu.

¹⁴ Dapat hayga pagbugyahan nimu aku, Panginuun? Hayga nguna magpatagu kawu sa kangku?

¹⁵ Ginan di waya sa anak aku, mag-agwanta yi aku ag diit wadi namatay. Inagwanta niku ti manga madala pag pagbuwatun nimu sa kangku.

¹⁶ Kanmu pangagalit ga mabaskug pag durus mag-ihampak sa kangku. Pagwasakun nimu aku sa subra madala nimu pag binwat sa kangku.

¹⁷ Nagsangput sa kangku parihu sa baha; bilang ga paglimusun nida aku.

¹⁸ Ipinakarayu nimu sa kangku kang manga pagmahalun ag manga kakilala; ti kadudulman imaw wadi kang kaibahan.