Kanta 86 - Hanunuu

Kanta 86 Darangin hampay Awatan Diyus

Kay darangin ni Dabid.

¹ Panginuun, patingihi ag saguta kang darangin dahil magkakurian aku ag magpangailangan.

² Alagai kang buhi dahil matinupadun aku sa kanmu. Kawu kang Diyus; ribrihan aku kanmu manugsirbi magsarig sa kanmu.

³ Panginuun, kaawai nimu aku dahil buu sirang aku magtawag sa kanmu.

⁴ Panginuun, pasulunga aku, kanmu manugsirbi dahil sa kanmu aku magdarangin.

⁵ Tutuu mayad kawu ag mapinatawadun, ag punu kawu pagmahal sa tanan magtawag sa kanmu.

⁶ Patingihi nimu kang darangin, Panginuun; patingihi kang magpaawa-awa sa kanmu.

⁷ Magtawag aku sa kanmu sa udas kakurian dahil pagsagtun nimu aku.

⁸ Panginuun, unman may diyus pumarihu sa kanmu; unman may una si unu ti makabwat kanmu manga binwat.

⁹ Binwat nimu ti tanan nasyun, ag sumamba sida sa kanmu. Dayawun nida kanmu ngaran.

¹⁰ Dahil makamaskihan kawu, ag makadululaw kanmu manga buwat; ag kawu lang ti Diyus.

¹¹ Panginuun, tudluan sa kangku kanmu kagustuhan, ag tupadun niku tunda may katapatan sa kanmu. Buwata aku masurundun sa kang maggalang sa kanmu.

¹² Panginuun niku Diyus, dayawun niku kawu sa buu niku tagipusuun. Dayawun niku kawu sa unman may katapusan.

¹³ Dahil daka kanmu pagmahal sa kangku; irinibri nimu aku sa kamatayan.

¹⁴ Diyus, paggirahun aku kaban marapadayaw pag manga tawu agud matyun. Manga maraisug sida ag balaw magkilala sa kanmu.

¹⁵ Dapat kawu, Panginuun, mapinasunaidun ag maawaun pag Diyus. Mapagmahal kawu ag matapat, balaw susun magkagalit.

¹⁶ Pakidnugi aku ag kaawai; ayawi aku kanmu kabisugan ag ribrihan aku, kanmu manugsirbi.

¹⁷ Ayawi aku puruyba kanmu kaayadan hampay makitan inda niku manga kalaban ag mangay-a sida. Dahil kawu, Panginuun, ti mag-awat ag magpasulung sa kangku.