Kanta 84 - Hanunuu

Kanta 84 Mag-ayup Atabug sa Balay Diyus

Ti isinurat manga anak ni Kura pag kanta para sa manugpanguna sa magkanta. Pagpatunugun sa panab-anan pamatunug “Gitit”.

¹ Panginuun Makamaskihan, pagkarinu kanmu Balay.

² Gustu gid niku umati! Mag-ayup aku makasaka sa kanmu Balay, Panginuun. Kang buu buhi manganta may kabayaan sa kanmu, buhi pag Diyus.

³ Panginuun Makamaskihan, kang Hari ag Diyus, una ti manga maya hanggan ti manga salimbabatang may manga pugad arani sa harandugan, nu naan nida pag-ipauli kanda manga pispis.

⁴ Mapalad ti manga tawu mag-uli sa kanmu Balay; pirmi sida magkanta manga pagdayaw sa kanmu.

⁵ Mapalad ti manga tawu magtanggap kabisugan ginan sa kanmu, ag maghingabut gid umati sa kanmu Balay.

⁶ Habang maglawuy sida sa Luung Mamara, pag-isipun nida may bulbugan ati, ga inmuran ati pag rugar, may danum una naan.

⁷ Lalu di gid sida magbisug habang maglakaw, tugka sa makaras-ug ti kada usa sa atubangan Diyus ati sa Siun.

⁸ Panginuun Diyus Makamaskihan, Diyus ni Hakub, patingihi kang darangin!

⁹ Diyus, papaladi nimu kanmi manugbaliwa, ti pinili nimu pag hari.

¹⁰ Ti usa ka sirang pagpangulian sa kanmu Balay mayad waya kaysa usa ka libu sirang pagpangulian sa una naan pag rugar. Diyus, palabihun waya niku manindug sa sabian nimu Balay kaysa mangulian sa balay manga magbuwat daut.

¹¹ Dahil kawu, Panginuun Diyus, parihu sa init magpakaun rayaw hanggan panangga makaalaga sa kanmi. Magpakaun kawu papalad hanggan kadayawan. Balaw nimu inirangan ti mayad pag manga bagay sa manga tawu magkabuhi matadlung.

¹² Panginuun Makamaskihan, mapalad ti manga magsarig sa kanmu.