Kanta 83 - Hanunuu

Kanta 83 Ti Daut pag manga Nasyun

Ti isinurat ni Asap pag kanta.

¹ Diyus, danga mabantayan lang kawu. Pagtandug kawu may tapil buwat!

² Bantayi kanmu manga kalaban, magkaragulu sida sa maggira bag-u magpayabang kuntay manalu sida.

³ Maggayak sida sa lihim laban sa kanmu nasakupan kanmu pag-alagaan.

⁴ Magkumun sida, “Abala kamu, ipadamhak nita ti nasyun Israil hampay malimtan yi inda tugka aban.”

⁵ Nagkausa sida sa kanda daut pag gayak. Nagbuwat sida kasunduan laban sa kanmu.

⁶ Sida ti manga Idumita, Ismailita, Muabita, Hagriyu,

⁷ Gibaliyu, Amunita, Amalikita, Pilistiyu, ag ti nasakupan sa Tiru.

⁸ Napabliwa diman sa kanda ti Asirya ti usa ka nasyun mabisug pag kakampi manga linahi ni Lut.

⁹ Panginuun, taluha sida parihu sa kanmu binwat sa manga Midyanita bag-u sa kan Sisara hanggan sa kan Habin sa may Luung Kisun.

¹⁰ Nagkaramatay sida sa Indur, kanda manga bangkay nagkararunut ag nagbaliw abunu sa daga.

¹¹ Matya kanda manga takinan parihu sa kanmu binwat sa kan Urib, sa kan Siib, sa kan Siba bag-u sa kan Salmuna.

¹² Magkun sida, “Agawun nita ti daga Diyus.”

¹³ Diyus niku, wayaka sida parihu sa galbuk ngatay sa upa pag-ipayag durus.

^14-15 Bukada sida bag-u padalaa nimu bagyu parihu sa apuy mag-irub sa manga kapuruan sa kabantudan.

¹⁶ Pakay-aha sida, Panginuun, tugka sa mamaawat sida sa kanmu.

¹⁷ Mana mangay-a sida ag madala sa unman may katapusan. Mana mamatay sida sa kakay-ahan!

¹⁸ Mana maalaman nida kawu, Panginuun, imaw lang gid ti Kaabwat-abwatan pag Diyus sa buu kalibutan.