Kanta 81 - Hanunuu

Kanta 81 Pagdayaw sa Kaayadan Diyus

Ti isinurat ni Asap pag kanta.

¹ Pagkanta kamu may kabayaan sa Diyus ti magpakaun kabisugan sa kanta. Paghuyaw kamu may kabayaan sa Diyus ni Hakub!

² Pagkanta kamu ag patunugan ti pamakaransing dungan ti marinu pag tunug alpa ag lira.

³ Patunuga ti budyung kada lapus lati ag kada kabilugan ti bulan, sa sirang nita kapistahan.

⁴ Dahil imaw inda ti kasuguan para sa manga taga Israil. Sugu inda Diyus ni Hakub.

⁵ Ipinakaun niya inda pag kasuguan sa manga lahi ni Husi katpung ginira niya ti Ihiptu. Nakadnug aku busis balaw niku kilala magkun,

⁶ “Irinibri niku kamu sa pagkapanawuhun; bin-ul niku ti manga mabuyat pag paras-anun hanggan kanyu bitbit.

⁷ Katpung asan kamu sa kakurian nandangup kamu sa kangku ag irinibri niku kamu. Ginan sa manga rurum sinagut niku kamu. Sinubukan niku kamu ati sa may bulbugan Miriba.

⁸ Manga nasakupan niku Israilita, patingihi niyu inda kang paandam sa kanyu. Pagpatingi mana kamu sa kangku!

⁹ Kailangan balaw kamu may tuhay diyus; danga gid kamu magsamba sa kanda.

¹⁰ Aku ti Panginuun niyu Diyus ti nagpaluwas sa kanyu sa Ihiptu. Paghagad kamu sa kangku ag pakan-an niku kamu kanyu manga pangangailangan.

¹¹ Dapat kamu pag manga Israilita kang nasakupan, unman kamu magpatingi ag magtupad sa kangku.

¹² Nakan pinabay-anan niku kamu sa kanyu kaganitan ulu, ag binwat niyu kanyu pagkaibgan.

¹³ Nu magpatingi lang mana kamu ag magsunud sa kang manga kagustuhan,

¹⁴ rargu parusahan ag taluhun niku kanyu manga kalaban.

¹⁵ Ti manga magkagalit sa kangku, manluhud sa kangku sa kadalaan. Kanda parusa unman may katapusan.

¹⁶ Dapat kamu kang manga nasakupan pakaunun niku kamu ag busgun pinakamayad pag burak tirigu hanggan daykut.”