Kanta 80 - Hanunuu

Kanta 80 Darangin hampay Awatan Diyus ti Nasyun

Ti isinurat ni Asap pag kanta para sa manugpanguna sa magkanta. Pagkatahun sa tunu “Ti manga Liryu para sa Karig-unan Kasunduan”.

¹ Patingihi kami, Manugbantay Israil, ti manuggiya sa manga lahi ni Husi parihu sa manga karanidu. Kawu matukawan sa kanmu tukawan hari sa tungud manga kirubin, pakakitan kanmu kamaskihan

² sa linahi ni Ipraim, ni Binhamin, ag ni Manasis. Pakakitan yi kanmu kamaskihan, bag-u atihi kami ag ribrihan.

³ Diyus, balikan duy sa kanmi ti mayad pag kahamtangan nimi. Pakakitan sa kanmi kanmu kaayadan hampay maribri kami.

⁴ Panginuun Diyus Makamaskihan, tugka waya lugud kapira kanmu pangagalit sa manga darangin nimu nasakupan?

⁵ Pinunu nimu kami karukuan, harus mainum yi nimi kanmi manga luwa.

⁶ Pinasnuan nimu awayun kami nimi karani pag manga nasyun, ag pagkasarin-an kami nimi manga kalaban.

⁷ Diyus Makamaskihan, balikan duy sa kanmi ti mayad pag kahamtangan nimi. Ipakakit nimu sa kanmi kanmu kaayadan agud maribri kami.

⁸ Kami kanmu nasakupan parihu sa puun ubas bin-ul nimu sa Ihiptu bag-u itinanum sa daga kay manga mag-ulian siyun pinaighit nimu.

⁹ Rinayawan nimu inda pag daga, bag-u nanggamut mayad ti ubas ag nanlugapgap inda sa buu daga.

¹⁰ Magkahamyan niya manga sanga ti manga kabantudan hanggan ti daraka pag manga kayu sidru.

¹¹ Naglangba kay manga sanga tugka sa Dagat Miditiranyu tugka sa Sapa Iyupratis.

¹² Diyus, dapat hayga dinaut nimu kay manga alad batu sa tunda pag ubasan? Nakan pagtakawun tanan lumalawuy inda kay manga burak.

¹³ Bag-u pagkan-un inda manga talun babuy hanggan iba waya talun hayup.

¹⁴ Pagbalik yi duy kawu sa kanmi, Diyus Makamaskihan! Ginan sa langit, bantayi kami kaayad. Alalahana kami kanmu nasakupan

¹⁵ parihu sa puun ubas kanmu itinanum sa panab-anan nimu kamaskihan. Alalahana kami kanmu manga anak kanmu pinarig-un para sa kanmu kadayawan.

¹⁶ Diyus, kami ga ubas pinlud ag inirub. Tinurun nimu kami may pangagalit ag rinuris.

¹⁷ Dapat kainda awati kami kanmu pinili bumaliw arani sa kanmu ag pinarig-un para sa kanmu kadayawan,

¹⁸ ag balaw yi kami pumatlikud sa kanmu. Balikan duy sa kanmi ti mayad pag kahamtangan nimi, ag sambahun nimi kawu.

¹⁹ Panginuun Diyus Makamaskihan, balikan sa kanmi ti mayad pag kahamtangan nimi! Pakakitan sa kanmi kanmu kaayadan hampay maribri kami.