Kanta 79 - Hanunuu

Kanta 79 Darangin sa Kahusayan Nasyun

Ti isinurat ni Asap pag kanta.

¹ Diyus, ginira manga taga iba nasyun ti magkaapu nimu pag daga. Inuringan nida kanmu banal pag Balay Diyus ag winayak ti Hirusalim.

² Ipinakaun nida sa manga manuk ag sa maraisug pag manga hayup ti manga bangkay nimu matinupadun pag manga manugsirbi.

³ Inuyang nida ti dugu nimu nasakupan parihu sa danum binmaha sa buu Hirusalim, ag unman may nasawad manlubung sa manga namatay.

⁴ Pagpakay-ahun kami ag pagpuyaan manga nasyun sa kanmi sangput.

⁵ Panginuun, tugka waya lugud kapira kanmu pangagalit sa kanmi? Tugka aw sa unman may katapusan? Lumabdab yi lang aw lugud parihu sa apuy kanmu imun?

⁶ Pakakitan kanmu pangagalit sa manga nasyun ag manga kaharian balaw magkilala ag magsamba sa kanmu.

⁷ Dahil pinanmatay nida kanmu nasakupan ag ipinadamhak kanda nasyun.

⁸ Danga kami pagparusahi dahil sa manga kasalanan nimi manga ginurang. Bagkus ngap, kaawai yi gid nimu kami taynguna dahil udyi kami may mahimu.

⁹ Awati kami, Diyus nimi manugribri, hampay madayaw kawu. Ribrihan kami ag patawada kanmi manga kasalanan para sa kanmu kadayawan.

¹⁰ Danga pagpahintuluti sumabi sa kanmi ti iba pag manga nasyun, “Naan yi lugud kanyu Diyus?” Habang magbantay kami, ipaisip nimu sa manga nasyun kuntay bumalus kawu sa kanda pagmatay sa kanmu manga manugsirbi.

¹¹ Patingihi ti arunghung nimu nasakupan binihag. Manga maratyun sida, nakan bawia sida nimu kapangyarihan.

¹² Panginuun, balusi pitu ka dubli kanmi katupad manga nasyun sa kanda magpuya sa kanmu.

¹³ Ag kami kanmu nasakupan, kanmu pagbantayan parihu sa manga karanidu, magpasalamat sa kanmu sa unman may katapusan. Dayawun nimi kawu pirmi tugka aban.