Kanta 78 - Hanunuu

Kanta 78 Ti Paggiya Diyus sa Kay Nasakupan

Ti “maskil” ngatay tula ni Asap.

¹ Manga kasimanwa, patingihi niyu kang manga tudlu.

² Tudluan niku kamu sa panab-anan manga pahalimbawa. Tultulan niku kamu manga lihim pag katutuuhanan kaybi

³ naalaman yi nita, dahil itinultul inda sa kanta nita manga ginurang.

⁴ Danga nita inda ipaulam sa kanta manga anak; itultul nita inda sa dumasun pag manga sinulput. Itultul nita sa kanda ti kamaskihan Panginuun hanggan kay kadayawan ag kaladulawan pag manga buwat.

⁵ Pinakan-an niya kasuguan ti nasakupan Israil, ti manga linahi ni Hakub. Binilinan niya kanta manga ginurang kuntay tudluan inda sa kanda manga anak,

⁶ hampay ti dumasun pag sinulput makaalam diman inda, ag mitudlu diman nida inda sa kanda manga anak.

⁷ Sa siyun pag paraan sumarig sida sa Diyus ag balaw nida malimtan kay manga binwat bagkus ngap tupadun nida kay manga sugu.

⁸ Balaw sida pumarihu sa kanda manga ginurang manga maganit kay ulu, balaw matinupadun, balaw marig-un kanda pagsarig sa Diyus, ag balaw matapat sa kanya.

⁹ Ti manga sundalu Ipraim, una may armas sida manga ugyung, nagpinalalagiw igu udas girahan.

¹⁰ Balaw nida sinunud kanda kasunduan sa Diyus; balaw nida sinunud kay kasuguan.

¹¹ Kinalimtan nida kay makadululaw pag manga buwat kay ipinakakit sa kanda.

¹² Nagbuwat ti Diyus makadululaw ati sa Suan, sa daga Ihiptu ag nakitan inda nita manga ginurang.

¹³ Tinunga niya ti dagat ag ipinalawuy sida; binwat niya ti danum ga manga alad batu.

¹⁴ Nu sirang, paggiyahan niya sida sa panab-anan rurum, ag nu yabi, sa panab-anan rayaw apuy.

¹⁵ Binka niya ti manga batu sa pangawakawaan ag nagbulus ti danum ag pinasugtan niya sida sa inum danum ga ginan sa kaabasad-basadan daga.

¹⁶ Ipinaluwang niya ti danum sa batu ag binmulus ti danum ga sa sapa.

¹⁷ Dapat kanta manga ginurang nagparargu sa pagbuwat kadautan laban sa kanya. Ati sa pangawakawaan naglaban sida sa Kaabwat-abwatan pag Diyus.

¹⁸ Kanda tinikis sinubukan ti Diyus, nanhagad sida kanda pagkaibgan pag karan-unun.

¹⁹ Pag-alukayuhun nida ti Diyus magkumun, “Makaalistu aw karan-an ti Diyus sitay sa pangawakawaan?

²⁰ Tutuu ipinahampak niya ti batu ag binmulwak ti danum, dapat makapakaun aw nguna siya tinapay hanggan taguban sa kanta sa kay nasakupan?”

²¹ Nakan nagalit ti Panginuun pagka nasaydan niya sida. Sa kay pangagalit sa manga Israilita, sa kay manga linahi ni Hakub, sinalakay sida niya apuy.

²² Dahil unman sida may pagsarig sa kanya, ag balaw sida magsarig kuntay iribri niya sida.

²³ Dapat una katida, binilinan niya ti langit pagbukas,

²⁴ bag-u pinauranan niya sida karan-unun pag-ingarnan mana. Ipinakaun niya sa kanda inda pag karan-unun ginan sa langit hampay kanda kan-un.

²⁵ Sida pag manga tawu nagkaun karan-unun anghil, ag pinasugtan gid sida Diyus.

²⁶ Ipinahuyup niya ti durus ginan sa butlakan hanggan sa salatan sa panab-anan niya kamaskihan.

²⁷ Ag pinauranan niya sida manga manuk parihu kay kayamu sa baras sa baybay dagat.

²⁸ Pinarugpu niya inda sa sangput nida manga turda ati sa kanda kampu.

²⁹ Nakan nagkaun sida ag nangabsug, dahil kanda pagkaibgan ipinakaun Diyus sa kanda.

³⁰ Dapat habang sigi sida magkaun,

³¹ nagalit ti Diyus sa kanda. Minatay niya ti makurasug pag manga kalay-awan sa Israil.

³² Una waya katida ti pinanmuwat niya, nagparargu diman sida sa pagbuwat daut. Una nagbuwat siya manga makadululaw, unman sida nagpaniwala sa kanya.

³³ Nakan kadaka lang niya inugtas kanda buhi sa panab-anan madali pag kadamhakan.

³⁴ Pagka minatay niya ti iba sa kanda, ti nasawad nagdangup sa kanya, nag-ampu ag nagpasirung gid sa kanya.

³⁵ Naalaala nida ti Kaabwat-abwatan pag Diyus imaw kanda palalan-iban pag batu ag manugribri.

³⁶ Dapat pabalhingu lang kanda magdayaw sa kanya. Manga pudilun sida.

³⁷ Balaw sida matinupadun sa kanya; balaw sida tapat sa kanda kasunduan sa kanya.

³⁸ Dapat una katida, maawaun di ti Diyus sa kanda. Pinatawad niya kanda manga kasalanan ag unman niya sida ipinadamhak. Mayamu bisis niya pinigil kay galit una masyadu yi gid kay pangagalit.

³⁹ Inisip niya manga tawu lang sida, parihu sa mag-arayhay durus magkalyam lang.

⁴⁰ Pira ka bisis naglaban sida sa Diyus ag nagparuku sa kanya ati sa pangawakawaan.

⁴¹ Paulit-ulit nida pagsubukan ti Diyus; ginalit nida ti Banal pag Diyus Israil.

⁴² Kinalimtan nida kay kamaskihan ti ipinakakit katpung irinibri niya sida sa kanda manga kalaban

⁴³ ag katpung binwat niya kay manga makadululaw ag lilingutan pag manga tanda ati sa Suan, sa daga Ihiptu.

⁴⁴ Binwat niya dugu ti manga sapa manga Ihipsiyu, ag dahil siyun unman sida makainum.

⁴⁵ Nagpadara siya kadamlan insiktu hampay pakurianan sida, hanggan manga pikaw agud dautun kanda manga daga.

⁴⁶ Ipinakaun niya sa apan kanda manga halaman hanggan manga tubas.

⁴⁷ Minatay niya kanda manga tanum ubas hanggan manga kayu sikumuru sa panab-anan uran yilu.

⁴⁸ Pinanmatay niya kanda manga hayup sa panab-anan diman uran yilu ag kilat.

⁴⁹ Dahil sa kay masyadu gid pag pangagalit sa kanda, pinadaran-an niya sida manga anghil agud rurisun sida.

⁵⁰ Balaw niya inampara kay pangagalit; balaw niya sida irinibri sa kamatayan, bagkus ngap minatay niya sida sa panab-anan manga sarut.

⁵¹ Minatay niya ti tanan panganay pag anak lalaki sa Ihiptu, imaw ti rugar manga linahi ni Kam.

⁵² Bag-u ipinalwas niya sa Ihiptu kay nasakupan parihu sa manga karanidu ag giniyahan niya sida sa pangawakawaan.

⁵³ Inibahan niya sida, nakan balaw sida magkadala. Dapat kanda manga kalaban nagkalalimus sa dagat.

⁵⁴ Dinara niya sida sa kay pinili pag daga, ati sa inagaw niya pag bantud sa panab-anan niya kapangyarihan.

⁵⁵ Pinaighit niya ti manga mag-uli ati pakarayu sa kay nasakupan, ag inayaw-ayaw niya ti daga sa manga linahi Israil hampay kanda apuun, ag ati niya sida ipinatahan.

⁵⁶ Dapat sinubukan nida ti Kaabwat-abwatan pag Diyus ag naglaban sida sa kanya. Balaw nida tinupad kay manga sugu.

⁵⁷ Nagpakarayu sida ag nagpudil sa Diyus parihu sa kanda manga ginurang. Balaw sida masarigan parihu sa daut pag ugyung.

⁵⁸ Pinaimun ag pinaisug nida ti Diyus dahil sa kanda manga diyus-diyusan sa manga simbahan sa abwat pag manga rugar.

⁵⁹ Alam Diyus inda pag binwat manga Israilita, nakan nagalit siya ag binugyahan niya sida lubus.

⁶⁰ Tinayakan niya kay turda sa Silu sa kay pag-ulian sitay sa kalibutan.

⁶¹ Pinahintulutan niya maagaw kalaban ti Kaban Kasunduan tanda niya kamaskihan ag kadayawan.

⁶² Nagalit siya sa kay magkaapu pag nasakupan, nakan ipinamatay niya sida sa girahan.

⁶³ Sinunug kanda manga anak lalaki, nakan naduraan arasawan-un kanda manga daraga.

⁶⁴ Nagkaramatay sa gira kanda manga manughandug Balay Diyus, ag kanda manga buranday babayi balaw makahimanglaw sa kanda.

⁶⁵ Bag-u ga nimata ti Panginuun; parihu siya sa usa ka mabisug pag tawu sinaladan pag irimnun makalangu.

⁶⁶ Tinabug niya kay manga kalaban; pinakay-a niya sida sa unman may katapusan.

⁶⁷ Balaw niya pinili ti linahi ni Ipraim kay manga lahi ni Husi.

⁶⁸ Bagkus ngap, pinili niya ti lahi ni Huda hanggan ti Bantud Siun kay pagmahalun.

⁶⁹ Ati niya pag-ibinungsud kay Balay Diyus marig-un tugka aban, parihu sa langit ag daga.

^70-71 Pinili Diyus si Dabid hampay kay manugsirbi. Bin-ul niya siya sa kay tarabahu manug-alaga karanidu ag binwat hari Israil, ti magkaapu niya pag nasakupan. Parihu si Dabid sa usa ka manug-alaga manga karanidu,

⁷² inalagaan niya mayad ti manga Israilita ag pinangunahan niya sida mayad.