Kanta 77 - Hanunuu

Kanta 77 Kabayaan sa Udas Kakurian

Ti isinurat ni Asap pag kanta para sa kan Hidutun, ti manugpanguna sa magkanta.

¹ Magtawag aku mabaskug sa Diyus. Magtawag aku sa kanya hampay masaydan niya aku.

² Sa udas kakurian magdarangin aku sa Panginuun. Ag nu yabi pag-ipaabawat niku kang manga kamang magdarangin, ag unman aku magkagasa, dapat unman diman aku may kabayaan.

³ Nu pag-isipun niku ti Diyus mag-arup aku aba ag magpanlumuy aku.

⁴ Unman niya aku pagpaturugun; balaw niku alam nu unu kang sabihun, dahil nabung-anan aku.

⁵ Pag-isip-isipun niku ti manga sirang nakalawuy ag ti dugay yi pag manga timpu.

⁶ Pag-alalahanun niku ti manga udas magkanta aku sa yabi. Mag-isip aku ag inda kang pag-ipaingana sa kang sadili:

⁷ “Bugyahan yi lang aw lugud aku Panginuun hanggan aban? Balaw yi gid aw lugud siya magbaya sa kangku?

⁸ Nadura yi gid aw lugud kay pagmahal sa kangku? Balaw yi gid aw lugud niya tupadun kay taratu?

⁹ Nalimtan yi aw lugud niya ti pagkamaawaun? Udyi aw siya may pangaawa dahil sa kay pangagalit?”

¹⁰ Bag-u magkun aku, “Ti ikinadaut niku tagipusuun ti Kaabwat-abwatan pag Diyus balaw yi mag-awat.”

¹¹ Panginuun, alalahanun niku kanmu manga buwat. Hu, alalahanun niku ti manga makadululaw pinamuwat nimu kaybi.

¹² Alalahanun niku ag isip-isipun ti tanan nimu makamaskihan pag manga buwat.

¹³ Diyus, kanmu palakaw tuhay kaysa iba. Unman may pumarihu sa kanmu kamaskihan.

¹⁴ Kawu ti Diyus magbuwat manga makadululaw. Pag-ipakakit nimu kanmu kamaskihan sa manga nasakupan.

¹⁵ Sa panab-anan nimu kapangyarihan irinibri nimu kanmu nasakupan pag manga linahi ni Hakub ag ni Husi.

¹⁶ Diyus, sa kaybi pag nangyari ti manga danum ga parihu sa tawu pagka nakakit sa kanmu nadala ag tinakigan.

¹⁷ Inmuran ginan sa manga rurum; nanlinti sa langit ag nankilat sa palibut.

¹⁸ Nasaydan ti linti sa manga bagyu; ti manga kilat nanrayaw sa kalibutan; ag natandug ti kalibutan.

¹⁹ Dinipay nimu ti dagat may daraka pag manga humbak, dapat unman kawu mag-akitan.

²⁰ Sa panab-anan ni Muysis ag ni Aarun giniyahan nimu kanmu nasakupan parihu sa manga karanidu.