Kanta 76 - Hanunuu

Kanta 76 Marapanalu ti Diyus

Ti isinurat ni Asap pag kanta para sa manugpanguna sa magkanta. Gamita ti manga pamatunug may bakyang.

¹ Kilala gid ti Diyus sa Huda; bantug siya sa Israil.

² Mag-uli siya sa Bantud Siun sa Hirusalim.

³ Ati pinandaut niya ti maglabdaban pag manga ugyung manga kalaban, kanda manga panangga, manga baladaw, ag ti iba waya nida manga armas.

⁴ Diyus, makamaskihan ag paggalangun kawu habang magdugsun kawu ginan sa manga bantud nu sa naan pinanmatay nimu kanmu manga kalaban.

⁵ Pinanbawi nimu ginan sa maraisug pag manga sundalu ti inagaw nida sa iba pag manga kasiyunan. Ag nagkaramatay yi sida tanan; una kanda manga kamang udyi nida magkakabyaw.

⁶ Diyus ni Hakub, sa kanmu pagtamyaw nagkaramatay ti manga manugkabayu hanggan kanda manga kabayu.

⁷ Diyus, pagkadalaan kawu. Si unu nguna ti makaagwanta sa kanmu nu magalit kawu?

⁸ Ginan sa langit magsintinsiya kawu. Nadala sa kanmu ti manga tawu sa kalibutan ag nanahimik sida

⁹ igu kawu, Diyus, nansintinsiya sa pagribri sa tanan pag-apihun sa kalibutan.

¹⁰ Pihu kanmu pangagalit sa manga tawu makapakaun kadayawan sa kanmu; pagpigilan waya nimu ti nasawad nimu pangagalit.

¹¹ Pagtaratu kamu sa Panginuun niyu Diyus ag tupada niyu inda. Ti tanan nasyun sa sangput mandara manga pamakaun sa Diyus garalangun.

¹² Pag-ipaababa niya ti marapadayaw pag manga takinan; pagkadalaan siya manga hari sa kalibutan.