Kanta 75 - Hanunuu

Kanta 75 Ti Diyus ti Manugsintinsiya

Ti isinurat ni Asap pag kanta para sa manugpanguna sa magkanta. Pagkantahun sa tunu “Danga Pagdauta”.

¹ Diyus, magpasalamat kami sa kanmu. Magpasalamat kami dahil arani kawu sa kanmi. Pag-ipabantug manga tawu kanmu makadululaw pag manga buwat.

² Magkun kawu, “May itinagka aku udas sa pagsintinsiya, ag sumintinsiya aku may katadlungan.

³ Nu matandug ti kalibutan ag takigan sa dala ti manga mag-uli siyun, aku ti manparig-un sa kay patakinan kalibutan.

⁴ Magkumun aku sa marapadayaw pag manga daut tawu kuntay danga sida magpadayaw ag magpayabang sa kanda kakayahan.

⁵ Magkumun aku sa kanda apasi yi nida kanda magpadayaw-dayaw.”

⁶ Kang-ud tunda ti pagsabihun Diyus, dahil ti panalu tawu balaw ginan sa una lang naan

⁷ nu unman ginan lang sa Diyus. Siya ti magsintinsiya; ipaababa niya ti iba ag ipaabwat ti iba.

⁸ Dahil ti Panginuun ti may hiyaput sa ungut punu magbura intus masyadu maisug imaw tunda kay pangagalit. Pagtigisun niya tunda, ag mag-inum ti tanan daut pag tawu sa kalibutan tugka sa matabu nida.

⁹ Dapat aku, balaw umapas sa pagtultul tungkul sa Diyus ni Hakub, ag kantahan niku siya manga pagdayaw.

¹⁰ Duraun niya ti kabisugan manga daut, dapat dugangan niya ti kabisugan manga matadlung.