Kanta 74 - Hanunuu

Kanta 74 Darangin para sa Nasyun sa Udas Kakurian

Ti “maskil” ngatay tula ni Asap.

¹ Diyus, hayga nguna parargu nimu kami pagbugyahan? Hayga magkagalit kawu sa kanmu pag-alagaan pag manga nasakupan?

² Diyus, alalahana kanmu nasakupan pinili nimu sa kabag-u bumaliw kanmu ag irinibri nimu hampay kanmu apuun. Alalahana ti Bantud Siun kanmu ulian.

³ Atihi baga ag bantayi ti parargu pagkadaut Balay Diyus dahil sa binwat manga kalaban.

⁴ Nanhuruyawan kanmu manga kalaban sa kanmu Balay, sa rugar nu naan magpakakit kawu sa kanmi. Nagpauli waya sida ati tanda kanda pagpanalu.

⁵ Dinaut nida ti Balay Diyus parihu sa magpulud manga kayu sa kapuruan sa panab-anan nida manga wasay.

⁶ Winayak nida ti rinirukan pag manga kayu sa panab-anan nida manga wasay ag manga piku.

⁷ Inirub nida kanmu Balay; inuringan nida inda kanmu pag-ulian.

⁸ Magkun sida sa kanda sadili rurisun nida kami lubus. Inirub nida ti tanan tiripnan pagsambahan sa kanmu sitay sa daga Israil.

⁹ Nadura yi ti palatandaan nimu kadayawan sa kanmi; udyi may purupita nasawad, ag udyi may nakaalam sa kanmi nu tugka waya kapira matapus inda pag magpangyari sa kanmi.

¹⁰ Diyus, tugka waya lugud kapira ti pagpakay-a nimi manga kalaban sa kanmu? Puyaan yi lang aw lugud nida kawu sa unman may katapusan?

¹¹ Hayga udwaya nimu sida pagparusahan? Parihu lang sa pag-itagu nimu kanmu kamang. Rurisa yi sida!

¹² Kawu, Diyus, ti kanmi hari ginan waya sa kabag-u, ag mayamu yi bisis irinibri nimu ti manga tawu sa kalibutan.

¹³ Tinunga nimu ti dagat sa panab-anan nimu kamaskihan, ag kawu ti nagrunut manga ulu daraka pag manga hayup sa dagat.

¹⁴ Kawu ti nagrunut manga ulu daragun pag-ingarnan Libyatan hanggan ti nagpakaun kay bangkay sa manga hayup mag-ulian sa pangawakawaan.

¹⁵ Kawu ti nagpadanum sa manga bulbugan hanggan sa manga bululusan danum. Kawu ti nagpak-at sa manga sapa balaw magkak-at.

¹⁶ Linalang nimu ti sirang ag ti yabi, ag kawu ti nagpauli init ag bulan sa kanda palaulian.

¹⁷ Kawu ti nagpauli tanan katugkaan sa kalibutan, ag kawu ti naglalang sa turungun hanggan sa abagat.

¹⁸ Alalahana, Panginuun, nu kabitay kawu pinakay-a ag pinuyaan manga unman may intindi pag manga kalaban.

¹⁹ Kanmu nasakupan parihu sa kalampati danga pagpahintulutan sa kanda manga kalaban parihu sa maisug pag hayup. Danga pagkalimti hanggan aban kanmu nasakupan pag-apihun.

²⁰ Alalahana kanmu kasunduan sa kanmi, dahil mayamu yi pag-unuunu ti pagbuwatun sa madulum pag manga rugar sa inda pag daga.

²¹ Danga pagpahintuluti mangay-a ti manga pag-apihun. Mana dayawun kawu manga makuri hanggan manga pugri.

²² Ungud, Diyus, baliwahi kanmu karampatan. Alalahana nu kabitay kawu pagpakay-ahun pirmi manga unman may intindi.

²³ Danga pagpabay-ani ti unman may apas pag ringgit nimu manga kalaban sa pagpakakit sa kanda pangagalit.