Kanta 72 - Hanunuu

Kanta 72 Darangin para sa Hari

Ti isinurat ni Sulumun pag kanta.

¹ Diyus, tudlui ti hari kanmu matadlung pag katuwiran,

² agud husayun niya matadlung kanmu nasakupan, lalu yi ti manga pugri.

³ Mana ti kabantudan pumakaun papalad sa kanmu nasakupan dahil magkabuhi sida matadlung.

⁴ Mana apinan ag awatan hari ti manga pugri, ag taluhun niya ti manga mag-api sa kanda.

⁵ Mana pumarargu kay maghari tugka aban sa panab-anan niya manga linahi, habang may init ag may bulan waya.

⁶ Mana pumarihu siya sa uran magpakaun danum sa daga.

⁷ Sa kay udas maghari, mana lumuntad ti katadlungan ag pagmayad ti kahamtangan manga tawu tugka aban.

⁸ Mana humari siya ginan sa Namatay pag Dagat tugka sa Dagat Miditiranyu, ag ginan sa Sapa Iyupratis tugka sa pinakaarayu pag bahagi sa kalibutan.

⁹ Mana kay manga kalaban mag-uli sa pangawakawaan pumasakup sa kanya.

¹⁰ Mana ti manga hari sa Tarsis, sa manga puru sa dagat, sa Shiba, ag sa Siba mangayaw sa kanya manga pamakaun sa pagpakakit magpasakup sida sa kanya.

¹¹ Mana ti tanan nasyun sumirbi sa kanya hanggan ti tanan hari pumasakup sa kanya.

¹² Dahil pag-awatan niya ti manga pinabay-anan pag manga pugri, ti maghagad awat sa kanya.

¹³ Naawa siya sa manga makuri hanggan pugri, ag pag-awatan niya sida.

¹⁴ Pag-iribri niya sida sa manga mag-unuunu hanggan mag-api dahil kanda manga buhi mahalaga sa kanya.

¹⁵ Mana mabuhi siya dugay. Mana pakan-an siya gintu ginan sa Shiba. Mana idarangin siya pag pirmi papaladan Diyus.

¹⁶ Mana umabunda ti manga ani sa daga una sa katayungtungan bantud, parihu sa manga ani sa Libanun. Mana yumamu ti manga mag-uli sa manga banwa, parihu sa manga ilamnun sa manga karatagan.

¹⁷ Mana balaw malimtan ti ngaran hari tugka aban, habang may init waya. Mana sa panab-anan niya, papaladan ti tanan nasyun, ag ti manga nasyun sumabi sa kanya mapalad.

¹⁸ Dayawun ti Panginuun Diyus, ti Diyus Israil, imaw lang gid ti magbuwat sa inda pag makadululaw pag manga bagay.

¹⁹ Dayawun kay kamaskihan sa unman may katapusan. Mana makitan manga tawu sa buu kalibutan kay kamaskihan. Amin! Amin!

²⁰ Inda ti katapusan darangin ni Dabid kay anak ni Isai.