Kanta 71 - Hanunuu

Kanta 71 Tultulan ti manga Binwat Diyus Tugka Aban

¹ Panginuun, sa kanmu aku maghagad panangga. Danga aku pagpahintuluti mangay-a.

² Awati aku ag ribrihan dahil matadlung kawu. Patingihi aku ag ribrihan.

³ Kawu kang palalan-iban pag batu; sa kanmu aku pirmi magdangup. Isinugu nimu kuntay ribrihan aku, dahil kawu kang palalan-iban pag batu ag matibay pag panangga.

⁴ Diyus niku, ribrihan aku sa kamang daut ag maisug pag manga tawu.

⁵ Dahil kawu kang pag-asa, Panginuun Diyus. Ginan sa anak waya aku, magsarig yi aku sa kanmu.

⁶ Ginan sa kang pagkalusad magsarig aku sa kanmu ag pag-alagaan nimu aku. Dayawun niku kawu sa unman may katapusan.

⁷ Nagbaliw mustara kang buhi sa mayamu, dahil kawu kang marig-un pag darangpan.

⁸ Dayawun niku pirmi kanmu pagkamakamaskihan.

⁹ Danga aku pagbugyahi nu gurangun yi aku. Danga aku pagpabay-ani nu malumuy yi.

¹⁰ Dahil kang manga kalaban magtipun ag magharampangan tungkul sa kangku; gustu nida aku matyun.

¹¹ Magkumun sida, “Pinabay-anan yi siya Diyus, nakan lagsun nita siya ag dakpun dahil unman may mangawat sa kanya.”

¹² Diyus niku, danga kawu magpakarayu sa kangku; awati aku rargu.

¹³ Mana ti manga magbangdan sa kangku mangay-a ag midamhak. Mana ti magkaibug manakit sa kangku, mangay-a ag puyaan.

¹⁴ Diyus, dapat aku pirmi di magsarig sa kanmu, ag dugangan waya gid niku ti pagdayaw sa kanmu.

¹⁵ Itultul niku pirmi kanmu matadlung pagbuwatun ti pagribri sa kanmu nasakupan, una balaw niku inda magkasalman.

¹⁶ Umatag aku sa kanmu Balay, Panginuun Diyus, ag dumayaw sa kanmu dahil sa kanmu makamaskihan pag manga binwat. Kanmu lang pag katadlungan kang pag-ipabantug.

¹⁷ Diyus, ginan sa anak waya aku, pagtudluan nimu aku tungkul sa kanmu makadululaw pag manga buwat, ag tugka kainda pag-itultul niku inda.

¹⁸ Ag una gurangun yi aku ag may uban yi, danga aku pagpabay-ani, Diyus, habang pag-ipabantug niku kanmu kapangyarihan ag kabisugan sa dumasun pag sinulput.

¹⁹ Kanmu pagkamatadlung, Diyus, balaw masalman. Makadululaw kanmu manga binwat; unman gid may pumarihu sa kanmu.

²⁰ Una pag-ipalakaw nimu aku sa mayamu pag manga pag-agwanta, pakan-an maan nimu aku bag-u pag buhi; ga sa parihu aku sa namatay buhiun di maan nimu.

²¹ Buwatun nimu aku mas lalu waya kilala, ag pasulungun maan nimu aku.

²² Diyus niku, dahil sa kanmu katapatan dayawun niku kawu sa panab-anan pagpatnug alpa. Banal pag Diyus Israil, kantahan niku kawu manga pagdayaw pagpatunugan alpa.

²³ Manhuyaw aku sa kabayaan habang magkanta aku manga pagdayaw sa kanmu dahil irinibri nimu aku.

²⁴ Itultul niku pirmi kanmu pagkamatadlung, ti manga magkaibug manakit sa kangku nangay-a ag nanalangtalang.