Kanta 70 - Hanunuu

Kanta 70 Darangin hampay Awatan Diyus

Ti isinurat ni Dabid pag kanta para sa manugpanguna sa magkanta. Pagkatahun inda sa kada maghandug bilang pag-alaala sa Panginuun .

¹ Panginuun Diyus, ribrihan aku ag rargu awati.

² Mana ti manga maghingbut manmatay sa kangku mangay-a ag manalangtalang. Mana ti manga mag-isip sa kang kadamhakan mamalalagiwan sa kay-a.

³ Mana ti manga magpuya sa kangku pumatlikud dahil nangay-a sida.

⁴ Dapat mana ti tanan magdangup sa kanmu makabaya gid dahil sa kanmu. Mana ti manga magkaibug karibrihan ginan sa kanmu pirmi sumabi, “Dayawun ti Diyus!”

⁵ Nu tungkul sa kangku, makuri ag pugri aku. Diyus, pagpakarani kawu rargu sa kangku! Kawu kang manug-awat ag manugribri. Panginuun, rargu aku awati.