Kanta 7 - Hanunuu

Kanta 7 Matadlung ti Diyus

Ti “shiggaion” ni Dabid tungkul sa kan Kus ginan sa lahi ni Binhamin. Kinanta niya inda sa Panginuun . Ti “shiggaion” mahimu usa ka kalasi kanta.

¹ Panginuun niku Diyus, sa kanmu aku pag magdangup. Ribrihan aku sa manga mag-unuunu sa kangku,

² dahil nu unman, barang matyun nida aku parihu sa paggus-ab liyun sa kay bulay. Pihu gid mangyari inda nu unman may manribri sa kangku.

³ Panginuun niku Diyus, nu nakabwat gid waydi aku salan sa kang kaparihu,

⁴ ngatay binalusan niku daut ti mayad pag binwat niku kakilala, ngatay inagawan niku manga kasiyunan kang manga kalaban sa unman waydi may kadahilanan,

⁵ pabay-ani aku unu-unuhun niku manga kalaban ag taluhun. Pabay-ani tatatataan nida aku tugka sa mamatay, ag tayakan kang bangkay sa daga.

⁶ Panginuun niku Diyus, ta malu duy, pakakitan kanmu pangagalit sa kang manga kalaban magkagalit gid sa kangku, dahil katadlungan diman kanmu paghanapun.

⁷ Tipuna sa kanmu sangput ti tanan nasyun, ag panguluhan nimu sida ginan sa langit.

⁸ Panginuun, kawu ti magsintinsiya sa manga nasyun. Patutuhani nimu unman aku may kasalanan, dahil alam nimu matadlung aku, ag unman aku may binwat daut.

⁹ Amparaha ti pagbuwatun kadautan manga tawu, ag papaladi ti manga matadlung, dahil matadlung kawu pag Diyus, ag pag-usisaun nimu kanmi manga naisipan hanggan tagipusuun.

¹⁰ Diyus, kawu ti mag-alaga sa kangku ga panangga. Pag-iribri nimu ti manga magkabuhi matadlung.

¹¹ Matadlung kawu pag manugsintinsiya, kada sirang magkagalit kawu sa manga daut.

^12-13 Nu balaw sida man-ampu kanda manga kasalanan alistu kawu pumarusa sa kanda. Parihu kawu sa sundalu maalistuhan yi kay panmatay pag manga armas. Inasa yi niya kay baladaw ag linabtung yi ti maglabdab pag-ugyung.

¹⁴ Ti daut pag manga tawu mag-isip daut hanggan kaguluhan, nakan ngani magpandaya sida.

^15-16 Dapat malu bantayi, kanda pagbuwatun kaguluhan hanggan pag-unuunu magbalik sa kanda. Parihu lang sa magkutkut sida ukang hampay malagpak ti iba, dapat sida ngap maaw ti malagpak.

¹⁷ Panginuun, pasalamatan niku kawu dahil sa kanmu katadlungan. Kantahan niku kawu manga pagdayaw, Kaabwat-abwatan pag Diyus.