Kanta 69 - Hanunuu

Kanta 69 Darangin Tawu Pag-unuunuhun

Ti isinurat ni Dabid pag kanta para sa manugpanguna sa magkanta. Pagkantahun sa tunu “Manga Liryu”.

¹ Diyus, ribrihan aku dahil parihu aku sa tawu ga malimus yi.

² Ga mag-italgub aku sa abasad pag lutuk ag unman aku may matat-an. Ga asan aku sa abasad pag danum pagtabunan manga humbak.

³ Magkagasa yi aku sa paghagad awat ag masakit yi kang tululnan. Diyus niku, nandulum yi kang pamantay sa kaalagad sa kanmu awat.

⁴ Mayamu ti maglaban ag magkaibug mumatay sa kangku sa balaw may kadahilanan. Mas mayamu waya sida sa kang buhuk. Pagpilitun nida aku ulian ti manga bagay balaw niku tinakaw.

⁵ Diyus, alam nimu kang manga kalukuhan; kang manga salan balaw mitagu sa kanmu.

⁶ Panginuun Diyus Makamaskihan, ti Diyus Israil, mana balaw mangay-a ti manga magsarig ag magdangup sa kanmu dahil sa kangku.

⁷ Dahil sa kanmu pagsurugun ag pagpakay-ahun aku.

⁸ Parihu aku sa day-uhan sa kang manga katawuhan; ga iba tawu aku sa kang manga patar-ari.

⁹ Kang magpahalaga sa kanmu Balay, ga apuy maglabdaban sa kang tagipusuun. Ti puya manga tawu sa kanmu dinamdam niku.

¹⁰ Nu maglumi aku ag magpauray, pagpakay-ahun nida aku.

¹¹ Nu magsulung aku saku sa pagpakakit pagpanrukuan niku, pagpuyaan nida aku.

¹² Paglibakun aku manga tawu matukawan sa puwirtahan banwa, ag ti manga langu magpathaw manga pangaway pag manga kanta tungkul sa kangku.

¹³ Dapat magdarangin aku sa kanmu, Panginuun. Sa udas kaawaan nimu aku, saguta kang darangin angay sa kanmu daka pag pagmahal sa kangku. Dahil tapat kawu sa pagribri,

¹⁴ awati aku danga aku mitalgub sa lutuk. Ribrihan aku sa manga maglaban sa kangku ga sa pag-iribri nimu aku sa abasad pag danum.

¹⁵ Danga pagpahintuluti mianud aku sa baha ngatay malimus sa manga humbak ngatay mamatay.

¹⁶ Saguta aku, Panginuun, dahil sa kanmu kaayadan ag pagmahal sa kangku. Pakidnugi aku angay sa kanmu daka pag pangaawa sa kangku.

¹⁷ Danga kawu magpatagu sa kangku, sa kanmu manugsirbi. Saguta rargu aku dahil atay aku sa kakurian.

¹⁸ Pagpakarani kawu sa kangku ag ribrihan aku sa kang manga kalaban.

¹⁹ Alam nimu nu kabitay nida aku pinakay-a ag inaway. Nakitan nimu ti tanan niku manga kalaban.

²⁰ Nabyatan aku sa kanda magpakay-a sa kangku ag nag-alangan kang buut. Nangalagad aku hampay kaawaan, dapat unman gid may naawa. Nangalagad aku hampay may manpasulung, dapat unman gid may nagpasulung.

²¹ Pinaulian nida makahilu kang karan-unun, ag katpung magkauwaw aku pinakan-an nida aku langgaw.

²² Mana kanda manga handaan mandara kadamhakan sa kanda hanggan sa kanda manga panawuhun.

²³ Mana mabuta sida ag pirmi mangirkirug

²⁴ Panginuun, pakakitan kanmu pangagalit sa kanda. Iparanas nimu sa kanda kanmu masyadu pag pangagalit.

²⁵ Mana pabay-anan yi lang kanda manga pag-ulian, ag udyi may mangulian sa kanda manga turda.

²⁶ Dahil pag-unuunuhun nida ti manga tawu kanmu pagparusahan, ag pag-itultul nida sa iba ti pag-agwanta manga biniyagan nimu.

²⁷ Dugangan waya gid inda sa kanda manga salan ag danga sida pagribrihan.

²⁸ Panasa kanda manga ngaran sa ribru listahan manga buhi; danga sida paglistahan kaibahan sa manga matadlung.

²⁹ Magkabyatan aku ag mag-agwanta, nakan alagai aku, Diyus, sa panab-anan pagribri sa kangku.

³⁰ Dayawun niku ti Diyus sa panab-anan kanta. Pagdayawun niku siya may pasasalamat.

³¹ Mas makapasulung inda sa Panginuun kaysa manga handug baka.

³² Nu makitan inda manga pugri, makabaya sida; ti manga magdangup sa Diyus rumig-un.

³³ Pagpatingihan Panginuun ti manga pugri ag balaw niya pagkalimtan ti binihag pag nasakupan niya.

³⁴ Dayawa niyu ti Diyus, niyu tanan asan sa langit, sa kalibutan, ag sa kadagatan.

³⁵ Dahil iribri Diyus ti Siun, ag ibungsud maan niya ti manga banwa Huda. Ag mangulianan asan kay nasakupan ag apuun tunda pag daga.

³⁶ Ti manga linahi niya manga manugsirbi imaw ti manmana sa tunda pag daga; ti manga magmahal sa kanya mangulianan siyun.