Kanta 68 - Hanunuu

Kanta 68 Manga Kanta tungkul sa Pagpanalu

Ti isinurat ni Dabid pag kanta para sa manugpanguna sa magkanta.

¹ Diyus, wayaka yi kanmu manga kalaban. Mana manpalalagiwan sida.

² Tabuga sida parihu sa anus pag-ipayag durus. Rurisa sida pag manga daut sa kanmu atubangan, parihu sa kandila magkatunaw sa apuy.

³ Dapat ti manga matadlung manhuruyawan sa kabayaan sa kanmu atubangan.

⁴ Kantahi niyu ti Diyus; kantahi niyu siya manga pagdayaw. Dayawun niyu siya masakyan sa rurum. Kay ngaran Panginuun; pagbaya kamu sa kay atubangan.

⁵ Ti Diyus, mag-uli sa kay banal pag Balay, mag-alaga sa manga ulila ag manug-apin sa manga buranday babayi.

⁶ Pagpakan-an niya magtal-anakan ti manga usa-usa balaw waya may kaibahan sa buhi ag pagpalpasan niya masulung ti manga pirisu. Dapat ti manga maglaban mangulianan sa mamara ag mainit pag daga.

⁷ Diyus, katpung pinangunahan nimu kanmu nasakupan sa pagpanlakawun sa pangawakawaan,

⁸ natandug ti daga ag nag-uran dahil nagras-ug kawu, Diyus sa Israil, kawu nagpahayag kanmu sadili sa Sinai.

⁹ Nagpadara kawu abunda pag uran ag nauranan ti mamara pag daga ti ipinakaun nimu sa kanmu nasakupan.

¹⁰ Asan sida nangulian, ag sa kanmu kaayadan pinakan-an nimu ti manga pugri kanda manga pangangailangan.

¹¹ Panginuun, nagpadara kawu tultulanun, ag ibinarita tunda kayamuan babayi:

¹² “Nagpinalalagiw ti manga hari hanggan kanda manga sundalu, kanda manga kasiyunan inayaw-ayaw manga babayi taga Israil.

¹³ Una ti manga napatayak sa tudiran manga karanidu inayawan manga diyus-diyusan kay histuda ga kalampati kay manga pakpak may pahaklup pilak ag kay pudpud pakpak may pahaklup lunsay gintu.”

¹⁴ Pagka pinanwayak Diyus Makamaskihan ti manga hari, ga manga snow inda ipinayag sa Bantud Salmun.

¹⁵ Pagkarinu ti bantud Basan, mayamu manga katayungtungan bantud.

¹⁶ Hayga maghirak inda sa bantud Siun, ti pinili Diyus kay ulianan tugka aban?

¹⁷ Nagras-ug ti Panginuun Diyus sa kay Balay ginan sa Sinai kaibahan kay linibu manga kalisa.

¹⁸ Igu nagtukad siya sa abwat pag rugar mayamu pag manga bihag kay dinara ag nakatanggap siya mayamu pakaun ginan sa manga tawu, una ginan sa manga malaban pag manga tawu. Ag ati pag mangulian ti Panginuun Diyus.

¹⁹ Dayawun ti Panginuun, ti Diyus kanta manugribri, dahil kada sirang pag-awatan niya kita sa kanta manga kaaburiduhan.

²⁰ Kanta Diyus, Diyus magribri. Siya ti Panginuun Diyus magribri sa kanta sa kamatayan.

²¹ Pihu gid runutun Diyus ti ulu niya manga kalaban magparargu sa pagbuwat kasalanan.

²² Magkun ti Panginuun, “Pabalikun niku kang manga kalaban ginan sa Basan; pabalikun niku sida ginan sa kalalawdan dagat,

²³ hampay panmatyun sida ag tatatataan niyu kanda dugu ag kanyu manga idu makapagustu sa pagsulup sa kanda dugu.”

²⁴ Diyus ag Hari niku, nakitan tanan kanmu parada kapanalunan atabug sa kanmu Balay.

²⁵ Asan sa unahan ti manga manugkanta ag sa uryan ti manga manugpatunug; sa kanda karaw-an ti manga daraga magpatunug kanda manga pamakaransing.

²⁶ Magringgit sida, “Dayawa niyu ti Diyus sa kanyu manga pagtiripun! Dayawa niyu ti Panginuun, kamu pag manga linahi ni Israil!”

²⁷ Mag-una ti diit pag lahi ni Binhamin, magdasun ti manga takinan Huda kaibahan kanda gurupu, ag magdasun ti manga takinan sa Sabulun ag Niptali.

²⁸ Diyus, pakakitan kanmu kamaskihan parihu sa kanmu binwat sa kanmi sa kabag-u.

²⁹ Dahil sa kanmu Balay sa Hirusalim dumara ti manga hari manga pamakaun sa kanmu.

³⁰ Tamyawa tunda pag nasyun parihu sa maisug pag hayup sa kugunan. Tamyawa diman ti manga nasakupan parihu sa tudu manga baka kaibahan sa manga turiti tugka sa manpanikluhud sida ag manhandug kanda manga pilak sa kanmu. Wayaka ti manga nasakupan magbaya sa girahan.

³¹ Ti manga taga Ihiptu pumasakup sa kanmu. Ti manga taga Itiyupya mandali-dali mangayaw kanda manga pamakaun sa kanmu.

³² Pagkanta kamu sa Diyus, kamu pag manga mag-uli sa manga kaharian sa kalibutan. Pagkanta kamu pagdayaw sa Panginuun

³³ masakyan sa kalangitan asan yi sa kabag-u di waya. Patingihi niyu kay magkurarug pag busis.

³⁴ Ipabantug niyu ti pagkamakamaskihan Diyus maghari sa Israil. Ti kalangitan magpaburayhaw kay pagkamakamaskihan.

³⁵ Makadululaw ti Diyus Israil habang magpaluwas siya sa kay banal pag ulian. Pagpakan-an niya kapangyarihan ag kabisugan kay nasakupan. Dayawun ti Diyus!