Kanta 66 - Hanunuu

Kanta 66 Pagdayaw ag Pagpasalamat

Ti isinurat ni Dabid pag kanta para sa manugpanguna sa magkanta.

¹ Kamu pag manga nasakupan sa buu kalibutan, paghuyaw kamu sa kabayaan sa Diyus.

² Pagkanta kamu manga pagdayaw sa kanya. Parangali niyu siya sa panab-anan niyu manga pagdayaw.

³ Sabihi niyu siya, “Diyus, makadululaw gid kanmu manga buwat. Dahil sa kanmu daka pag kamaskihan, kanmu manga kalaban magluhud sa kanmu sa kadalaan.

⁴ Ti tanan tawu sa buu kalibutan dumayaw sa kanmu. Manganta sida manga pagdayaw sa kanmu.”

⁵ Abala kamu, bantayi niyu ti makadululaw pag manga binwat Diyus sa manga tawu.

⁶ Pinamara niya ti dagat; ag dinipay nita manga ginurang ti sapa lakaw lang. Sa tunda pag binuwat Diyus pagbaya kita.

⁷ Hari siya sa unman may katapusan sa panab-anan niya kamaskihan, ag pagbantayan niya ti manga nasyun. Ti manga maglaban sa Diyus danga magpadayaw sa kanda sadili.

⁸ Manga nasakupan, dayawa niyu ti Diyus! Padnugan kanyu pagdayaw sa kanya.

⁹ Pag-alagaan niya kanta buhi; balaw niya pag-ipahintulut midamhak kita.

¹⁰ Diyus, sa ungud pagsubukan nimu kami; linumpiyu nimu kami parihu sa pilak ipinalakaw sa apuy.

¹¹ Pinasulun nimu kami sa suduk ag pinapas-an sa mabuyat pag manga dararan-un.

¹² Pinatat-an nimu kami sa kanmi manga kalaban; ga nangagwanta kami sa apuy ngatay sa baha. Dapat kainda ipinauli nimu kami sa mayad pag kahamtangan.

¹³ Mansagda aku sa kanmu Balay manga handug pagsunugun. Tupadun niku kang manga itinaratu sa kanmu

¹⁴ kang sinabi katpung may kakurian waya aku.

¹⁵ Mansagda aku sa kanmu matabul pag manga hayup bilang handug pagsunugun, parihu sa karanidu, tudu baka, ag kambing.

¹⁶ Abala kamu ag pagpatingi, tanan kamu pag maggalang sa Diyus, dahil sabihan niku kamu nu unu kay binuwat sa kangku.

¹⁷ Maghagad aku awat sa kanya ag dinayaw niku siya.

¹⁸ Nu pinabay-anan lang niku kang manga kasalanan unman mana nagpatingi ti Panginuun sa kangku.

¹⁹ Dapat nagpatingi gid ti Diyus sa kangku; pinatingihan niya kang darangin.

²⁰ Dayawun ti Diyus, unman gid niya pagdayuun kang manga darangin, ag pagmahalun gid niya aku.