Kanta 64 - Hanunuu

Kanta 64 Ti Parusa sa Daut pag manga Tawu

Ti isinurat ni Dabid pag kanta para sa manugpanguna sa magkanta.

¹ Diyus, patingihi kang riklamu. Alagai kang buhi dahil pagpadalaun aku niku manga kalaban.

² Alagai aku laban sa tunda pag manga gurupu maggayak daut.

³ Marasakit sida nu magbagaw, parihu sa baladaw hanggan ugyung.

⁴ Madali sida magbagaw marasakit sa manga tawu matadlung, ag balaw sida magkadala magbagaw katida.

⁵ Paggaryahun nida ti usa kag usa agud buwatun kanda gayak daut. Ag paggayakun nida nu naan nida pag ipauli kanda manga suduk. Magkumun sida, “Balaw may makakit inda.”

⁶ Maggayak sida daut ag magkumun, “Mayad gid kanta gayak!” Balaw gid masalman ti kaisipan ag tagipusuun tawu!

⁷ Dapat panaun sida Diyus, ag kadaka lang sida mabiyagan.

⁸ Parusahan sida Diyus dahil sa kanda manga baragawun. Ti tanan makakit sa kanda mangil-ilung sa pagpuya sa kanda.

⁹ Bag-u dalaun ti tanan tawu. Isip-isipun nida ti binwat Diyus. Ag itultul nida inda.

¹⁰ Magbaya ag mandayaw sa Panginuun ti tanan matadlung dahil sa binwat niya. Ag mandangup sida sa kanya.