Kanta 63 - Hanunuu

Kanta 63 Ti Pagmahal Diyus mas Mahalaga waya kaysa Buhi

Ti isinurat ni Dabid pag kanta habang ati sa pangawakawaan Huda.

¹ Diyus, kawu kang Diyus ag magdangup aku sa kanmu. Magkauwaw kang buu buhi sa kanmu, ga asan aku sa mamara pag daga unman may danum.

² Nakitan gid niku kanmu pagkamakamaskihan hanggan kadayawan sa kanmu Balay.

³ Dayawun niku kawu dahil kanmu pagmahal subra waya mahalaga kaysa buhi.

⁴ Pasalamatan niku kawu habang magkabuhi aku. Ipaabwat niku kang manga kamang sa kang magdarangin sa kanmu.

⁵ Makabaya aku parihu sa tawu busug gid sa karan-an. Ag dumayaw aku sa kanmu maghuyaw sa kabayaan.

⁶ Habang mahuwayan aku pag-alalahanun niku kawu. Sa buu yabi pag-isip-isipun niku kawu,

⁷ dahil kawu ti mag-awat sa kangku. Manhuyaw aku sa kabayaan mintaras pag-alagaan nimu aku parihu sa pag-alaga manuk sa kay manga butu sa sirung niya manga pakpak.

⁸ Magpakarani aku sa kanmu, ag paghiyaptan nimu aku hampay balaw aku maunu.

⁹ Ti manga maggayak mumatay sa kangku umatag sa ulian manga namatay.

¹⁰ Magkaramatay sida sa girahan, ag kanda manga bangkay kan-un manga simarun idu.

¹¹ Magbaya ti hari dahil sa binwat Diyus sa kanya. Magbaya diman ti tanan magtaratu sa ngaran Diyus. Dapat balaw pabagawun Diyus ti manga bibig manga pudilun.