Kanta 62 - Hanunuu

Kanta 62 Pagsarig sa Alaga Diyus

Ti isinurat ni Dabid pag kanta para sa kan Hidutun, ti manugpanguna sa magkanta.

¹ Sa Diyus lang aku may kahusayan; kang karibrihan ginan sa kanya.

² Siya lang kang palalan-iban pag batu ag manugribri. Siya kang darangpan, nakan balaw gid aku mataranta.

³ Kamu tanan kang manga kalaban, tugka waya lugud kapira kanyu magsalakay sa kangku agud matyun aku? Parihu aku sa alad batu ga magkarup-ag ngatay ga balatbat magkagpu.

⁴ Gustu lang niyu paighitun aku sa kang abwat pag katungkulan. Magbaya kamu magpudil. Magbagaw kamu mayad sa kangku dapat sa basad niyu tagipusuun pagkadat-an niyu aku.

⁵ Sa Diyus lang aku makatanggap kahusayan dahil pagpakan-an niya aku pag-asa.

⁶ Siya lang kang palalan-iban pag batu ag manugribri. Siya kang darangpan, nakan balaw aku mataranta.

⁷ Asan sa Diyus kang karibrihan ag kadayawan. Siya kang marig-un pag palalan-iban batu, kang manug-alaga.

⁸ Kamu pag manga nasakupan Diyus, pagsarig kamu sa kanya sa tanan pag udas! Tultulan sa kanya ti tanan niyu kaaburiduhan dahil siya ti mag-alaga sa kanta.

⁹ Ti manga tawu, kilala man ngatay unman, balaw masarigan. Parihu lang sida unman may pulus; magaan waya sida sa durus.

¹⁰ Danga kamu magsarig sa magpanguwarta. Danga kamu magsarig may mab-ul kamu sa panab-anan panakaw. Una magdugang waya kanyu kayamanan, danga inda pagsarigi.

¹¹ Balaw lang kas-a nasaydan niku magkun ti Diyus sa kanya ti kapangyarihan ag ti pagmahal.

¹² Pihu gumanti ti Panginuun sa manga tawu angay sa kanda manga binwat.