Kanta 61 - Hanunuu

Kanta 61 Darangin hampay Alagaan Diyus

Ti isinurat ni Dabid pag kanta para sa manugpanguna sa magkanta. Gamita ti manga pamatunug may bakyang.

¹ Diyus, patingihi kang magtawag, patingihi kang darangin.

² Atay sa arayu gid pag rugar magtawag aku sa kanmu dahil naduraan aku pag-asa. Daraha aku sa abwat pag batu, sa rugar unman may mahawag,

³ dahil kawu imaw ti mag-alaga sa kangku; parihu kawu sa bantayaw mag-alaga sa daka pag banwa laban sa kalaban.

⁴ Patahana aku sa kanmu Balay hanggan aban ag alagai aku parihu sa pag-alaga manuk sa kay manga butu sa sirung niya manga pakpak.

⁵ Dahil nasaydan nimu, Diyus, kang manga taratu sa kanmu ag pinakan-an nimu aku manga bagay ipinakaun nimu sa manga magsunud sa kanmu.

⁶ Palawiga ti buhi hari ag paharia siya hanggan aban sa panab-anan niya manga linahi.

⁷ Mana humari siya hanggan aban pag-ibahan nimu, Diyus. Alagai siya sa kanmu pagmahal ag katapatan.

⁸ Bag-u manganta aku pirmi manga pagdayaw sa kanmu ag tupadun niku pirmi kang taratu sa kanmu.