Kanta 60 - Hanunuu

Kanta 60 Darangin hampay Awatan Diyus

Ti isinurat ni Dabid pag kanta pagka natapus kay laban sa manga taga Aram Naharaim ag sa manga taga Aram Suba, ag pagka nuli si Huab ginan sa labanan ag pagmatay sa 12,000 ka Idumita sa luung pag-ingarnan Asin. Itudlu inda pagkanta. Para sa manugpanguna sa magkanta. Kantahun inda sa tunu “Liryu para sa pagparig-un Kasunduan”.

¹ Diyus, binugyahan nimu kami ag ipinatalu. Nagalit kawu sa kanmi, dapat kainda pakidnugi kami.

² Hinalu nimu ag pinagil-ang ti daga Israil, dapat kainda magpakihampang aku sa kanmu kaayada nimu inda dahil bilang magkarup-ag yi inda.

³ Pagpakurianan gid nimu masyadu kami kanmu nasakupan. Magdampiray kami; ga linangu nimu kami irinmun makalangu.

⁴ Dapat pinaandaman diman nimu kami paggalang sa kanmu hampay makaaman kami sa manga ugyung kalaban.

⁵ Ribrihan kami sa panab-anan nimu kapangyarihan. Saguta kanmi manga darangin hampay makaribri kami kanmu manga pagmahalun.

⁶ Diyus, magkun kawu ati sa kanmu Balay, “Manalu aku; tungaun niku ti Sikim ag Karatagan Sukut ag iayaw sa kang nasakupan.

⁷ Kangku ti Gilyad katunda diman ti Manasis. Ti Ipraim kang manug-apin, ag ti Huda imaw kang manugpanguna.

⁸ Ti Muab kang suruguun ag ti Idum kang nasakupan. Magringgit aku kapanaluhan laban sa Pilistiya.”

⁹ Si unu ti mandara sa kangku sa Idum ag sa daka pag banwa inda magkasangputan manga alad batu?

¹⁰ Bukun aw lugud kawu, imaw ti Diyus, nagbugya sa kanmi ag unman yi mag-iba sa kanmi manga sundalu?

¹¹ Awati kami laban sa kanmi manga kalaban, dahil balaw may kabuluhan ti awat tawu.

¹² Manalu kami sa panab-anan nimu awat, nimi Diyus, dahil taluhun nimu kanmi manga kalaban.