Kanta 6 - Hanunuu

Kanta 6 Darangin hampay Awatan Panginuun

Kanta ni Dabid para sa manugpanguna sa magkanta. Gamita ti pamatunug may walu ka bakyang.

¹ Panginuun, una magkagalit kawu sa kangku, danga aku pagparusahi.

² Kaawai aku ag paayada, dahil magpanlumuy yi aku.

³ Nabung-anan yi gid aku, Panginuun. Kapira waya lugud nimu aku pag paayadun?

⁴ Panginuun, patingihi duy aku ag ribrihan. Angay sa kanmu pagmahal sa kangku, ribrihan gid aku sa kamatayan.

⁵ Dahil nu mamatay aku balaw yi makaimatuun sa kanmu; udyi aku makadayaw sa kanmu sa ulian manga namatay.

⁶ Magkagasa yi aku sa kang masyadu magpaka-arunghung. Kada yabi kang sangdayan tupus luwa.

⁷ Magkarabaga yi kang mata sa pakalumi dahil sa binwat tanan niku manga kalaban.

⁸ Pagpakarayu kamu sa kangku, kamu pag manugbuwat kadautan, dahil nasaydan Panginuun kang maglumi.

⁹ Nasaydan niya kang maghagad awat. Ag sagtun niya kang darangin.

¹⁰ Mangay-a ag madala gid ti tanan niku kalaban. Kadaka malagiw sida dahil sa kakay-ahan.