Kanta 59 - Hanunuu

Kanta 59 Darangin Laban sa manga Daut pag Tawu

Ti isinurat ni Dabid pag kanta para sa manugpanguna sa magkanta. Isinurat niya inda pagkarargu nagpadara tawu si Saul sa kay balay hampay tiidan siya ag matyun. Pagkantahun sa tunu “Danga Pagdauta”.

¹ Diyus, ribrihan aku sa kang manga kalaban; alagai aku sa manga maglaban sa kangku.

² Ribrihan aku sa daut pag manga tawu manugmatay.

³ Panginuun, bantayi nu kabitay sida mag-alagad sa pagmatay sa kangku una balaw aku nagsalan sa kanda.

^4-5 Unman aku may nabwat kasalanan, dapat alistu sida gumira sa kangku. Panginuun Diyus Makapangyarihan, Diyus Israil, pakidnugi aku ag awati. Parusahi yi ti manga tawu balaw magsunud sa kanmu. Danga pagkaawai ti daut pag manga manugdaya.

⁶ Magbalik sida nu yabi mag-ngurub parihu sa idu habang magpalibut sa daka pag banwa.

⁷ Patingihi kanda pagsabihun; makasakit inda parihu sa baladaw. Magkumun waya sida, “Unman may makadnug sa kanmi.”

⁸ Dapat pagkasarin-an lang nimu sida, Panginuun, pagpuyaan nimu sida tanan ti balaw magsunud sa kanmu.

⁹ Diyus, kawu kang kabisugan; mag-alagad aku sa kanmu dahil kawu kang darangpan,

¹⁰ ag kawu ti Diyus magmahal sa kangku. Giyahan nimu aku ag ipakakit nimu sa kangku ti pagkatalu niku manga kalaban.

¹¹ Dapat danga sida kadaka pagmatya hampay balaw malimtan niku nasakupan nu kabitay nimu pagpakurianan kanmu manga kalaban. Panginuun kanmi manug-alaga, patalanga ag padamhakan kang manga kalaban sa panab-anan nimu kamaskihan.

¹² Pagpasalanun sida nida baragawun, nakan mana masduk sida sa kanda pagkamarapadayaw-dayaw. Magsaad sida ag magpamudil,

¹³ nakan sa kanmu pangagalit, rurisa sida tugka sa magkaradura sida. Bag-u maalaman buu kalibutan, kawu, Diyus, maghari sa Israil.

¹⁴ Magbalik kang kalaban nu yabi mag-ngurub parihu sa idu habang magpalibut sa daka pag banwa.

¹⁵ Parihu sida sa idu magpalibut-libut maghanap karan-unun, ag magsubang nu balaw busug.

¹⁶ Dapat aku manganta tungkul sa kanmu kabisugan. Kada surip manganta aku mabisug tungkul sa kanmu pagmahal. Dahil kawu kang darangpan, mag-alaga sa kangku sa udas kakurian.

¹⁷ Diyus, kawu kang kabisugan; manganta aku manga pagdayaw sa kanmu dahil kawu kang darangpan, ti Diyus magmahal sa kangku.