Kanta 58 - Hanunuu

Kanta 58 Midamhak ti manga Daut

Ti isinurat ni Dabid pag kanta para sa manugpanguna sa magkanta. Pagkantahun sa tunu “Danga Pagdauta”.

¹ Kamu pag manga takinan, matadlung aw kanyu paghatul sa manga tawu?

² Balaw! Dahil kanyu lang pag-isipun imaw ti pagbuwat daut. Magpandaut kamu sa kanyu ulian.

³ Ti manga daut magpakarayu sa Diyus ag magpamudil ginan waya sa kanda pagkalusad.

^4-5 May dalit sida parihu sa manga ulay. Parihu sida sa dupung balaw magpatingi sa busis anad pag manugparignuk.

⁶ Panginuun Diyus, bul-a kanda kabisugan sa pagpanakit ga sa magrungab kawu manga ngipun liyun.

⁷ Madura mana sida parihu sa danum magkak-at, ag nu magpana sida, danga mana sida makapantuk.

⁸ Bumaliw mana sida parihu sa kuhul ga sa magkatunaw kay bilug habang magyapang, ngatay parihu sa anak ilinusad tigbak, balaw nakakit rayaw.

⁹ Padamhakan sida, anak man ngatay gurangun. Padamhakan sida mas mabaskug waya sa pag-init anglit pag pagbahan manga madugi pag manga kayu.

¹⁰ Makabaya ti manga matadlung nu makitan yi nida pag balusan Diyus ti manga daut, ag nagbulus yi kanda dugu.

¹¹ Bag-u sumabi ti manga tawu, “Tutuu gid ungud may pirimyu para sa manga matadlung ag may Diyus maghatul sa manga tawu sa kalibutan.”