Kanta 56 - Hanunuu

Kanta 56 Darangin may Pagsarig sa Diyus

Ti isinurat ni Dabid pag kanta para sa manugpanguna sa magkanta. Isinurat niya inda pagkatapus siya dinakup manga Pilistiyu sa Gat. Kantaha inda sa tunu “Ti kalampati sa Insina sa Arayu pag Rugar”.

¹ Diyus, kaawai aku, dahil pag-unuunuhun aku niku manga kalaban. Balaw mag-apas kanda magpakuri sa kangku.

² Parargu ti paggira sa kangku niku manga kalaban. Kaabwat-abwatan pag Diyus, mayamu ti maglaban sa kangku.

³ Nu magkadala aku, magsarig aku sa kanmu.

⁴ Diyus, pagdayawun niku kawu dahil sa kanmu taratu. Balaw aku madala dahil magsarig aku sa kanmu. Balaw makasakit ti tawu sa kangku.

⁵ Pirmi pagpatalangun niku manga kalaban kang pagsabihun. Kanda pirmi paggayakun imaw ti manakit sa kangku.

⁶ Magmirinsanan sida ag magpatagu, ag pagbantayan nida ti tanan niku pagbuwatun kay turunu matyun nida aku.

⁷ Diyus, danga sida pagpabay-ani makaiwas sa parusa sa kanda kadautan. Sa kanmu pangagalit parusahi tunda pag manga tawu.

⁸ Alam nimu kang magkabung-anan. Pagtandaan nimu kang manga maglumi. Unman aw ilinista nimu inda sa kanmu libru?

⁹ Diyus, nu magdangup aku sa kanmu, manpalalagiwan kang manga kalaban. Inda nalakawan niku, dahil kawu, Diyus, mag-alaga sa kangku.

¹⁰ Panginuun Diyus, pagdayawun niku kawu dahil sa kanmu taratu.

¹¹ Balaw aku magkadala dahil magsarig aku sa kanmu. Balaw makasakit ti tawu sa kangku.

¹² Diyus, tupadun niku kang taratu sa kanmu. Ihandug niku kang handug pagpasalamat sa kanmu.

¹³ Dahil irinibri nimu aku sa kamatayan, ag balaw nimu pinasnuan matalu aku, agud magkabuhi aku sa may karayawan pag buhi, sa kanmu atubangan.