Kanta 55 - Hanunuu

Kanta 55 Ti Darangin Tawu Dinaya Niya Kakilala

Ti “maskil” ngatay tula ni Dabid para sa manugpanguna sa magkanta. Gamita ti manga pamatunug may bakyang.

¹ Diyus, patingihi kang darangin; patingihi kang maghagad awat.

² Patingihi ag saguta aku. Magkaaburidu aku sa kang manga kakurian.

³ Magkataranta yi aku sa manga magpadala ag magpangapi niku daut pag manga kalaban. Dahil pagguluhun nida aku ag pagdumtan sa kanda pangagalit.

⁴ Masyadu ti kaba sa kang dubdub. Pagkulbaan aku barang mamatay aku.

⁵ Pagtakigan aku sa kadalaan, sa masyadu gid pag kadalaan.

⁶ Nu may pakpak lang mana aku parihu sa kalampati, lumayang aku ag manhanap paraharyan.

⁷ Lumayang aku atabug sa arayu pag pangawakawaan ag ati pag mangulian.

⁸ Mandali-dali aku manhanap kang paratag-an hampay patagu sa pangagalit niku manga kalaban ga mabisug pag durus ngatay buhawi.

⁹ Panginuun, rurisa kang manga kalaban; buwata sida unman magkarasundu. Dahil nakitan niku ti kahigpitan ag kaguluhan sa takinan banwa.

¹⁰ Sirang yabi magpangyari inda una naan sa takinan banwa. Punu kadautan ag kaguluhan ti takinan banwa.

¹¹ Ti pagpadamhak una naan lang; ag unman mag-apas ti pagpangapi ag pagpandaya sa manga puun karsada.

¹² Nu kang kalaban magsurug sa kangku maagwanta di niku inda. Nu kang kalaban magpuya sa kangku maamanan di niku siya.

¹³ Dapat kang gid ngap kaparihu, kaibahan, ag suud kakilala ti magsurug sa kangku.

¹⁴ Dati pirmi kami magkaibahan, ag mag-atag kami sa Balay Diyus kaibahan ti mayamu pag manga tawu.

¹⁵ Mana kadaka lang mamatay kang manga kalaban. Mana milbung sida buhi sa lulubngan. Dahil ti kadautan asan diman sa kanda hanggan sa kanda manga ulian.

¹⁶ Dapat aku maghagad awat sa Panginuun Diyus ag pag-iribri niya aku.

¹⁷ Surip, karaw-an sirang, ag yabi magriklamu aku ag mag-arunghung, ag pagpatingihan niya aku.

¹⁸ Iribri niya aku hampay balaw aku maunu sa kang maglaban, una mayamu ti maglaban sa kangku.

¹⁹ Ti Diyus maghari sa unman may katapusan manpatingi sa kangku ag ipaababa niya kang manga kalaban. Inda sida unman may pagbag-u ag unman maggalang sa Diyus.

²⁰ Kang kakilala kaybi nanlaban sa kay manga kakilala; unman niya tinupad kay manga itinaratu.

²¹ Maalumanay ag mayad siya magbagaw, dapat may galit kay tagipusuun, ag kay manga pagbagawun makabiyag parihu sa matarum pag baladaw.

²² Katiwalaan sa Panginuun kanmu manga kaaburiduhan, dahil alagaan niya kawu. Balaw niya pabay-anan maunu magkatalinduwa ti manga matadlung tugka aban.

²³ Dapat ti manga manugmatay hanggan ti manga magdaya iyamut niya sa ulian manga namatay, sa unman waya magbaligtunga kanda buhi. Dapat aku, sumarig sa Diyus.