Kanta 53 - Hanunuu

Kanta 53 Ti Kadautan manga Tawu

Ti “maskil” ngatay tula ni Dabid para sa manugpanguna sa magkanta. Gamita ti pamatunug “Mahalat”.

¹ Magkun ti manga kurang kay intindi sa kanda sadili, “Unman may Diyus!” Daut sida tanan ag mayagting kanda manga pagbuwatun. Unman una di usa sa kanda ti magbuwat mayad.

² Ginan sa langit magbantay ti Diyus sa manga tawu agud usisaun nu may nakaintindi sa katutuuhanan ag magdangup sa kanya.

³ Ti tanan nagtalang sa tutuu pag dalan ag parihu nagbaliw daut kanda buhi. Unman gid una di usa sa kanda ti magbuwat mayad.

⁴ Unman aw lugud alam inda pag daut manga tawu sa kanda pagbuwatun? Pihu alam diman! Magkabuhi sida sa panab-anan pagpanguwarta sa kang manga kasimanwa, ag unman sida magdarangin sa Diyus.

⁵ Dapat takigan gid sida sa dala udwaya nida nalakawan ginan sa kabag-u, dahil wayakun Diyus kanda manga but-ul. Ti manga maggira sa kanyu, sa manga Israilita pakay-ahun niyu dahil binugyahan sida Diyus.

⁶ Mana rumas-ug yi ti tagapagribri sa Israil ginan sa Siun. Manhuyaw sa kabayaan ti manga Israilita, ti nasakupan Diyus, nu ibalik yi niya kanda mayad pag kahamtangan.