Kanta 52 - Hanunuu

Kanta 52 Ti Pagsintinsiya ag ti Pangaawa Diyus

Ti “maskil” ngatay tula ni Dabid para sa manugpanguna sa magkanta. Pagka nag-ati si Duig taga Idum sa kan Saul hampay isumbung kuntay si Dabid nag-atag sa balay ni Ahimilik.

¹ Kamu pag manga makapangyarihan pag manga tawu, hayga pag-ipadayaw niyu kanyu kadautan? Unman aw lugud ti Diyus mayad pirmi sa kanyu?

² Maggayak kamu ipadamhak ti iba. Kanyu dila parihu sa matarum pag siyaw. Ti magpandaya imaw kanyu pagbuwatun.

³ Pagmahalun niyu ti daut kaysa mayad, ag ti kapudilan kaysa katutuuhanan.

⁴ Kamu pag manga madaya, magkaibug kamu manakit sa iba sa panab-anan niyu manga baragawun.

⁵ Pihu parusahan kamu Diyus sa ud may katapusan. Dakpun niya kamu ag guyudun tag sa luwas niyu manga balay. Ag bawiun niya kanyu arup.

⁶ Makitan inda manga matadlung ag manlingut sida. Kasarin-an nida kamu ag sumabi sida,

⁷ “Bantayi niyu ti manga tawu balaw magsarig sa Diyus bilang kanda marig-un pag darangpan. Bagkus ngap magsarig sida sa kanda mayamu pag kasiyunan ag nag-amat waya gid kanda kapangyarihan sa panab-anan pagpadamhak sa iba.”

⁸ Dapat aku parihu sa kayu ulibu magtubu sa Balay Diyus. Magsarig aku sa kay pagmahal sa unman may katapusan.

⁹ Diyus, pagpasalamatan niku kawu tugka aban dahil sa kanmu binwat. Magsarig aku sa kanmu dahil mayad kawu sa kanmu matinupadun pag nasakupan.