Kanta 50 - Hanunuu

Kanta 50 Ti Tutuu pag Pagsamba

Ti kanta isurat ni Asap.

¹ Ti Panginuun, makamaskihan pag Diyus, magbagaw ag magtawag sa manga tawu una naan pag bahagi kalibutan.

² Magsinglaw siya ginan sa Siun, ti unman gid may ikasabi kay rinu pag banwa.

³ Rumas-ug ti Diyus ag balaw siya manahimik lang. Sa kay unahan may maglabdab pag apuy ag sa kay sangput may mabisug pag bagyu.

⁴ Pagtawagan niya ti kalangitan ag ti kalibutan hampay kumastigus sa kay pagsintinsiya sa kay nasakupan.

⁵ Magkun siya, “Tipuna sa kang atubangan kang matinupadun pag nasakupan nagbuwat kasunduan sa kangku sa panab-anan handug.”

⁶ Pag-ipaburayhaw kalangitan ti pagkamatadlung Diyus, dahil siya ti magsintinsiya.

⁷ Magkumun waya ti Diyus, “Kamu kang nasakupan, patingihi niyu kang sabihun. Aku ti Diyus, kanyu Diyus; kumastigus aku taynguna laban sa kanyu manga taga Israil.

⁸ Unman niku kamu pagsungyawun sa kanyu manga maghandug, sa kanyu pirmi pag-isagda pag manga handug pagsunugun.

⁹ Dapat balaw aku magkailangan kanyu tudu manga baka ag manga kambing,

¹⁰ dahil kangku ti tanan hayup: ti manga hayup sa katalunan, ti manga baka sa linibu-libu manga tagudtud,

¹¹ ti tanan manuk sa manga bantud, ag ti manga hayup sa karatagan.

¹² Nu lun-usun aku balaw niku kamu hagadan karan-unun, dahil kangku ti kalibutan ag ti tanan asan.

¹³ Magkaun aw lugud aku taguban tudu baka ngatay mag-inum dugu kambing? Pihu unman.

¹⁴ Ti kailangan niku pag handug kanyu pasalamat, ag ti pagtupad sa manga taratu niyu sa kangku, ti Kaabwat-abwatan pag Diyus.

¹⁵ Pagdangup kamu sa kangku sa udas kakurian, dahil iribri niku kamu, ag dayawun niyu aku.”

¹⁶ Dapat sa manga daut inda ti pagsabihun Diyus, “Unman kamu may karampatan sa pagsampit sa kang manga sugu ag kasunduan.

¹⁷ Pagkadat-an niyu kang magtamyaw sa kanyu; unman niyu pagpansinun kang manga pagbagawun.

¹⁸ Nu may mag-akitan kamu magtakaw pag-updun di ngapu niyu siya, ag magkuyug diman kamu sa magpanguragin.

¹⁹ Magbagaw kamu sa daut ag madali kamu magbagaw kapudilan.

²⁰ Pagpuyaan niyu pirmi kanyu manga patar-ari.

²¹ Katpung binwat niyu inda pag manga bagay, nanpadung lang aku, ag nag-isip kamu parihu lang aku sa kanyu. Dapat tamyawun niku kamu ag ipakakit niku sa kanyu nu kabitay kamu ka daut.

²² Patingihi niyu inda, kamu pag manga magkalimut sa Diyus, dahil nu unman, rurisun niku kamu ag unman may rumibri sa kanyu.

²³ Maggalang sa kangku ti maghandug may pasalamat, ag ti magdahan sa kay pag-ugaliun iribri niku.”