Kanta 5 - Hanunuu

Kanta 5 Darangin hampay Alagaan Panginuun

Kanta ni Dabid para sa manugpanguna sa magkanta. Gamita ti palawta.

¹ Panginuun, patingihi kang darangin may arunghung.

² Diyus niku ag hari, patingihi kang maghagad awat sa kanmu, dahil magdangup aku sa kanmu.

³ Sa madlum surip pag-ialistu niku kang sadili hampay mandarangin sa kanmu. Makalawuy darangin niku mag-alagad aku kanmu sagut.

⁴ Kawu ti Diyus balaw magbaya sa kadautan; balaw nimu pagtanggapun ti daut pag manga tawu.

⁵ Balaw makapakarani sa kanmu atubangan ti manga marapadayaw-dayaw; ag pagkadat-an nimu ti tanan magbuwat daut.

⁶ Pagrurisun nimu ti manga pudilun. ag pagkagalitan nimu ti manga magmatay tawu hanggan ti manga manugdaya.

⁷ Dapat aku, makasaka di sa kanmu banal pag Balay dahil sa kanmu daka pag pagmahal sa kangku. Ag ati dayawun niku kawu may paggalang.

⁸ Panginuun, dahil mayamu kang manga kalaban, giyahi aku angay sa kanmu katadlungan, ag buwata malpus kang pagsunud sa kanmu kagustuhan.

⁹ Balaw masarigan ti pagsabihun niku manga kalaban, dahil paghingbutun nida ipadamhak ti iba. Kanda manga baragawun mahawag ga kalubngan mabukasan. Kanda manga pagsabihun pudu pandaya.

¹⁰ Diyus, parusahi duy kang manga kalaban. Mana kanda daut pag manga gayak imaw ngapu ti pumadamhak sa kanda. Bugyahi sida dahil sa kanda mayamu pag kasalanan, dahil naglabag sida sa kanmu.

¹¹ Dapat makabaya mana ti tanan maghagad awat sa kanmu. Mana kumanta sida sa kabayaan hanggan aban. Alagai sida ti magmahal sa kanmu hampay makabaya sida dahil sa kanmu binwat sa kanda.

¹² Dahil pagpapaladan nimu, Panginuun, ti manga matadlung. Kanmu pagmahal mag-alaga sa kanda parihu sa panangga.