Kanta 49 - Hanunuu

Kanta 49 Unman may Pulus ti Magsarig sa Kayamanan

Ti isinurat manga anak ni Kura pag kanta para sa manugpanguna sa magkanta.

¹ Pagpatingi kamu, tanan kamu pag manga nasakupan mag-uli sitay sa kalibutan,

² kilala man ngatay unman, mayaman man ngatay pugri.

³ Mamagaw aku may kadunungan ag mag-isip aku manga may pulus.

⁴ Mamatingi aku sa manga kabagawan ag itultul niku kay ibug sabihun habang pag-ipatunug niku ti alpa.

⁵ Balaw aku magkadala nu rumas-ug ti kadamhakan, nu sangputan aku daut ag madaya pag manga tawu

⁶ magsarig ag magpadayaw sa kanda kayamanan.

⁷ Ti usa ka tawu balaw gid kumaya bumayad sa Diyus para sa buhi niya ngatay para sa buhi iba.

⁸ Dahil masyadu mahal ti buhi; balaw gid may kumang-ud halaga

⁹ hampay mabuhi ti tawu sa unman may katapusan ag balaw yi mamatay.

¹⁰ Dahil mag-akitan tanan una ti manga madunung magkaramatay, katunda diman ti manga unman may intindi ag manga maganit kay ulu. Ag nu mamatay yi sida tayakan lang nida kanda kayamanan sa iba.

¹¹ Kanda kalubngan imaw kanda balay sa unman may katapusan. Asan sida mangulianan hanggan aban una may pag-apuun sida manga daga.

¹² Una mayaman waya ti tawu, mamatay diman siya parihu sa manga hayup.

¹³ Imaw inda ti patabgan manga tawu magsarig sa kanda sadili, ag imaw diman ti patabgan manga magsunud ag magpaniwala sa kanda pagsabihun.

¹⁴ Itinagka yi mamatay sida parihu sa manga karanidu. Ag ti kamatayan imaw ti mag-antabay sa kanda atabug sa lulubngan parihu sa manug-alaga mag-antabay sa manga karanidu. Sa sirang pagribri Diyus, humari sa kanda ti manga magkabuhi matadlung. Kanda manga bangkay magkararunut. Ti lulubngan imaw ti kanda ulian.

¹⁵ Dapat aku iribri Diyus sa kapangyarihan kamatayan, dahil bul-un niya aku.

¹⁶ Danga kawu magkataranta nu ti iba magyaman, nu ti kayamanan nida magtal-anakan magkadugangan waya gid.

¹⁷ Dahil balaw nida inda madara nu mamatay sida; kanda kayamanan balaw nida madara sa lulubngan.

¹⁸ Una waya sa kanda magkabuhi pagkumnun nida kanda sadili pinapaladan Diyus, ag pagdayawun sida manga tawu dahil may kaabundahan sida,

¹⁹ ipaamut diman sida sa kanda manga ginurang nagkaramatay yi, ati sa rugar unman nida mag-akitan kay rayaw.

²⁰ Ti mayaman pag tawu balaw makaintindi sa katutuuhanan mamatay parihu sa manga hayup.