Kanta 48 - Hanunuu

Kanta 48 Ti Siun ti Daka Banwa Diyus

Ti isinurat manga anak ni Kura pag kanta para sa manugpanguna sa magkanta.

¹ Makamaskihan ti Panginuun nita Diyus, ag dapat gid dayawun sa kay banwa asan sa kay banal pag bantud.

² Marinu kay abwat inda ag magpakaun kasulungan sa buu kalibutan. Inda pag banal pag Bantud Siun imaw ti banwa Makamaskihan pag Hari.

³ Asan ti Diyus sa marig-un pag manga bahagi sa Hirusalim ag naipakakit yi niya sa manga mag-uli siyun siya kanda darangpan.

⁴ Nagtipun ti manga hari sa pagsalakay sa Hirusalim,

⁵ dapat pagka nakitan nida inda, nadiklahan gid sida ag namalalagiwan sa dala.

⁶ Tinakigan sida sa kadalaan parihu sa babayi magpanamdam.

⁷ Ipinadamhak sida Diyus parihu sa manga barku Tarsis winayak bagyu ginan sa butlakan.

⁸ Nasaydan nimi kaybi ti manga pinamuwat Diyus ag kainda nakitan nimi inda sa banwa nimi Diyus, ti Panginuun Makamaskihan. Parig-unun niya inda pag banwa hanggan aban.

⁹ Diyus, pag-isip-isipun nimi kanmu pagmahal sa sulud nimu Balay.

¹⁰ Bantug kawu ag pagdayawun manga tawu sa buu kalibutan, dahil marapanalu kawu sa panab-anan nimu kamaskihan.

¹¹ Magbaya ti manga nasakupan Siun ag ti manga mag-uli sa tuhay pag banwa sa Huda, dahil sa kanmu matadlung pag pagsintinsiya.

¹² Manga Israilita, sangputa niyu ti Siun ag bilanga kay manga bantayaw.

¹³ Bantayi niyu kaayad ti manga alad batu ag ti marig-un pag manga bahagi sa tunda pag banwa, hampay matultulan niyu ti dumasun pag manga sinulput

¹⁴ kuntay ti Diyus nita pagsirbihan kainda imaw kanta Diyus sa unman may katapusan. Siya ti maggiya sa kanta hanggan aban.